USD
АСТАНА. 28 мамыр. Интернетте Нұрсұлтан Назарбаевтың інісі Сатыбалдының баласы Қайратты колониядағылардың «сындырғаны» жайлы қауесет тарап жатыр. Бұл туралы ҚазТАГ дерегіне сүйенген rast.kz хабарлайды.
«Орташа қауіпсіздікті мекемеде бас бостандығынан айырылу түрінде жазасын өтеп жатқан Қайрат Сатыбалды колония қабырғасында «сындырылды», – делінген таратылған хабарламада.
Осы хабарламаның авторлары «Қазақстандағы салафиттердің атаманы» деп атап отырған Назарбаевтың туған інісі – Сатыбалдының баласы Қайраттың жанына міндеттеріне моральдық жағынан және күш қолдану арқылы қысым жасау жолымен оны «сындырып», көкірегін басу, жуасытып, жағдайға көндіктіру кіретін екі тұтқын отырғызылғанын баяндайды.
«Камераға екі жаңа қонақ отырғызылған күннің кешінде ұлттық қауіпсіздік комитетінің сотталған экс-генералы колонияның қоғамдық орындарын тазалау жұмыстарына қосыла бастады», – делінген таратылған хабарламада.
ҚазТАГ редакциясы бұл ақпардың анық-қанығын тексеріп көрген.
«Сотталушы Қ. Сатыбалды Шығыс Қазақстан облысындағы №22 қылмыстық атқару жүйесі департаменті мекемесінде қолданыстағы заңнамаға сәйкес жалпы негізде жазасын өтеп жатыр… Ішкі тәртіп ережелеріне сәйкес, Қ. Сатыбалды отрядта басқа тұтқындармен бірге ұсталып отыр, олардың тарапынан Қ. Сатыбалдыға қатысты заңға қайшы әрекеттер жасалған жоқ. Басқа бірқатар орындар сияқты, аталмыш мекемеде де бейнебақылау жүйесі орнатылған», – деп хабарлады Ішкі істер министрлігіне қарасты қылмыстық атқару жүйесі комитетінің баспасөз қызметіндегілер.
Еске сала кетейік, Қайрат Сатыбалды 2022 жылғы 26 қыркүйекте сот үкімімен алты жылға сотталған болатын. Оның мүлкі тәркіленіп, 10 жылға мемлекеттік қызметте лауазым атқаруға тыйым салынды. Бұдан бөлек, арнайы шені мен мемлекеттік наградаларынан түгел айырылды.
Сот процесін судья Нұрлан Баяхметов жүргізді.
Бізге мәлім болғандай, 2018-2022 жылдар аралығында Қайрат Сатыбалды талан-таражға салу арқылы «Көліктік сервис орталығы» АҚ қаражатын жымқыруды ұйымдастырған. Ол үшін алдын ала сөз байласып, АҚ-ның басшылық лауазымдағы тұлғаларының қызметтік өкілеттігін пайдаланған. Орындаушылар ретінде директорлар кеңесінің төрағасы М.Мұхамбеджанұлы және АҚ президенті Г.М.Бекетов болған. Олар бақылаудағы сотталған компаниялармен жалған келісімшарттар жасап, АҚ қаражатын шығарып отырған. Осылайша ұйымдасқан үшеу «Көліктік сервис орталығы» акционарлік қоғамына 28 млрд теңгеден астам сома көлемінде материалдық шығын келтірген.
Бұдан бөлек, 2018-2022 жылдар аралығында Қайрат Сатыбалды сенімге қиянат жасау және алдау жолымен «Қазақтелеком» АҚ-ның мүлік иесіне мүліктік залал келтіруді ұйымдастырған. Қылмысын алдын ала сөз байласу арқылы Ч.Қоңырбаевпен және АҚ-ның корпоративтік бизнес дирекциясының директоры Л.Муравьевпен бірге іске асырған. Атап айтқанда, байланыс каналдарын бақылаудағы жалғыз әрі бірыңғай жеткізуші компания – «Qaztelcom.kz» ЖШС арқылы жоғары бағамен жалға беруді, сондай-ақ байланыс каналдарын абоненттік төлемсіз қосуды ұйымдастырған. Бұдан келесі ұйымдасқан үштік акционерлік қоғамға 12 млрд теңгеден астам сомаға материалдық залал келтірген.
Кейін Қ.Сатыбалды, М.Мұхамбеджанұлы, Г.Бекетов, Ч.С.Қоңырбаев, Л.А.Муравьевтің кінәсі аудиторлық есептерпен, куәларды сұрау хаттамаларымен, мамандардың қорытындысымен, заттай айғақтармен, өзара есептесу бойынша бухгалтерлік құжаттармен, құжаттық тексеру актілерімен, АҚ мен бақылаудағы сотталған компаниялар арасында жасалған шарттар және оларға қосымша келісімдермен, шегерім ұсыну туралы өкімдермен, орындалған жұмыстың актілерімен расталған.
Сотта сотталушылар кінәларын толық көлемде мойындады.
«Көліктік сервис орталығы» АҚ мүлкін талан-таражға салу фактісі бойынша 28 млрд теңгеден астам көлемдегі залал сомасы толық өтелді.
«Қазақтелеком» АҚ-ға мүліктік залал келтіру фактісі бойынша 12 млрд теңгеден астам көлемдегі залал толық өтелді.
