USD
ҚЫЗЫЛОРДА. 20 қараша. Қызылорда облысы биыл да өзінің инвестиция тарту жөніндегі межесінің биігінен көрінгелі тұр. Бұл туралы облыс әкімі баспасөз қызметінің мәліметіне сүйенген rast.kz хабарлайды.
Мұның жайын бүгін Қызылорда облысының әкімі Нұрлыбек Нәлібаев Орталық коммуникациялар қызметінің көшпелі брифингінде кеңінен айтып өтті.
Мемлекет басшысы Қасым-Жомарт Тоқаеатың Қазақстан халқына арнаған соңы Жолдауында отандық және шетелдік инвестицияларды тарту облыстардың негізгі міндеттерәнің бірі алға қойылған болатын. Ал Қызылорда облысы осыған байланысты биылғы жылға межеленген 517,5 млрд теңгенің 478,3 млрд теңгесіне 10 айда қол жеткізіп отыр.
Осы ретте аймақта соңғы үш жылда 30,3 млрд теңгенің 35 инвестициялық жобасы іске қосылғанын айта кетуіміз керек.
«Атап өту қажет, өңірге бекітілген индикатор соңғы екі жыл қатарынан артығымен орындалуда. 2022 жылы 373,5 млрд. теңге индикатор белгіленген еді, атқарылған жұмыстар нәтижесінде жоспар 10,6 пайызға артығымен орындалып, 413,3 млрд.теңге болды. Ал өткен жылы 424,2 млрд.теңге индикатор бекітіліп, жоспар 21 пайызға артығымен орындалды, яғни 513,7 млрд.теңге инвестиция тартылды», – деді Нұрлыбек Нәлібаев өзінің сөзінде.
Оның айтуынша, Қызылорда көрсеткіштің өсу қарқыны, жоспарлы көрсеткіштің орындалуы жағынан өңірлер арасында І орынға шыққан. Өнеркәсіп саласының дамуына серпін берген шыны зауыты арқылы өндіріске 42 млрд теңге инвестиция тартылды. Қажетті шикізаттар шетелден, әсіресе Ресейден, Өзбекстаннан тасымалдануда. Зауыт іске қосылғаннан бері 37,1 млрд теңгенің 28,7 млн шаршы метр шынысын өндірді. Өнімнің 70 пайызы ішкі нарыққа, 30 пайызы Өзбекстан, Қырғызстан, Тәжікстан, Сакартвело және Ресей елдеріне экспортқа жіберіледі. Қазіргі таңда зауытта 400-ге жуық адам жұмыс жасауда.
«Инвестиция тарту, өндірістік кооперацияны дамыту, жаңа жобаларды іске асыру үшін шетелдік компания басшылары, дипломатия өкілдері облысқа жұмыс сапарымен келіп, кездесулер ұйымдастыруда. Аймақта инвесторларға қолайлы климат қалыптасты деп айтуға толық негіз бар», – деді соңында облыс әкімі.
Облыс аумағында жүзеге асырылған ірі инвестициялық жобалар қатарында «Болат Өтемұратов қорының» демеушілігімен салынған «Қорқыт ата әуежайының» жаңа терминалы бар. Қазіргі күндері «Акса Энерджи» түрік компаниясының инвестициясы арқылы қуаттылығы 240 мегаваттық жаңа жылу-электр орталығының құрылысы қарқынды жүріп жатыр.
