Қызылорда облысында алғашқы «Жайлы мектеп» қатарға қосылды
ҚЫЗЫЛОРДА. 20 қараша. Қызылорда «Жайлы мектеп» бағдарламасы бойынша салынған ең алғашқы білім мекені пайдалануға берілді. Бұл туралы облыс әкімі баспасөз қызметінің мәліметіне сүйенген rast.kz хабарлайды.
Облыс әкімі Нұрлыбек Нәлібаев бүгін Орталық коммуникациялар қызметінің Қызылордада өткен көшпелі брифингінде осы жаңалықты жиналғандарға жеткізді.
«Өткен жылдан бері облыста 1 мың 720 орындық 6 мектеп,1 мың 850 орындық 4 мектепте қосымша ғимарат салынып, ел игілігіне тапсырылды. 2024 жылы жаңадан 3 мектеп, 5 мектепке қосымша құрылыс салынып, пайдалануға берілді.«Жайлы мектеп» ұлттық жобасы аясында салынған мектептердің алғашқылардың бірі болып 900 оқушыға арналған білім ордасы облыс орталығындағы жаңа шағын ауданнан ашылды», – деді аймақ басшысы.
Қызылорда қаласының сол жағалауында «Жайлы мектеп» ұлттық жобасымен бой көтерген 21 мектептің алғашқысы шәкірттерді қабылдай бастады.
Қазіргі таңда мұнда 6000 орындық 9 мектептің құрылысы қарқынды жүруде. «Білім беру инфрақұрылымын қолдау» қоры арқылы құны 8 млрд 400 млн теңге болатын дарынды балаларға арналған 400 орындық физика-математика мектеп-интернаты салынып жатыр. Сонымен қатар, облыстық бюджет есебінен инновациялық шығармашылық орталығының құрылысы жүргізілуде.
Бұдан бөлек, биыл «Қазгермұнай» компаниясының демеушілігімен Қызылорда қаласында 2,5 млрд теңгеге заманауи үлгідегі 350 орындық «Оқушылар сарайы» салынып, уақытылы пайдалануға берілді. «Саутс Ойл» компаниясының демеушілігімен 4,8 млрд теңгеге музыкалық колледждің жаңа ғимараты салынуда. Оның құрылысы 2025 жылы аяқталады.
