USD
ҚЫЗЫЛОРДА. 21 қараша. Қызылорда облысының әкімі Нұрлыбек Нәлібаев жергілікті «Қайсар» футбол командасы бюджеттің 5 млрд теңгесін шашып, чемпион болмай-ақ қойғаны жөн екенін айтты. Бұл туралы Vesti.kz ақпарына сүйенген rast.kz хабарлайды.
Аймақ басшысы Премьер-лигада ойнайтын «Қайсар» клубына бюджеттен 1,2 млрд теңге бөлінетінін жеткізді.
«5 миллиард теңге бөлгенше, чемпион болмай-ақ қойсын», – деді ол.
Әкім сонымен бірге «Қайсар» футбол клубының қарызы туралы да сөз қозғады. Оның айтуынша, команда басшылығы ойыншылардың жалақысын жарытып төлей алмай отыр. Ұжымда соңғы үш айдан бері айлық алмаған футболшылар көп. Оның үстіне, клуб бұрыннан қалып кеткен 400 млн теңге қарызын жыл сайын бөліп төлеп келеді.
Сөз сыңайында Нұрлыбек Нәлібаев «Қайсардың» әкімдіктен алатын бюджеті жақын уақытта өспейтінін айтты.
«Сырттан келген ойыншыларға босқа ақша төлегеннен гөрі тұрғындар пайдалы маңызды жобаларды қолға алғанымыз жөн. Маған да клубтың басшысы келіп, «қаражатты көбейтсек, бұдан да жақсы нәтиже көрсетеміз, бірінші орын аламыз» деді. «Бюджеттен 5 миллиард теңге бөліп, бірінші болмай-ақ қойдық» дедім оған. «Қайсар» – бюджеттен ең аз қаражат қарастырылған команда, оны мойындаймын. Бюджет жағынан ең төменгі орындарда тұрғанымыз анық. Бірақ сол ақшаны ауылдарда спортты дамытуға бөлгеніміз дұрыс. 80 спорт алаңы салынды. Стадион салынып жатыр. Спорт кешендері салынып жатыр. Біздің мақсат – қалаға көрік беретін ғимараттар емес, қаракөздерімізді тәрбиелейтін, пайдасы тиетін нысандар салу», – деді Нұрлыбек Машбекұлы өзінің сөзінде.
Облыс әкімі содан кейін клубтың ойыншылар алдындағы қарызына қатысты сауалға жауап берді.
«Қарыз бізге дейін болған. Клуб басшылығына тапсырма бердім. Егер шын мәнінде біздің қарыз екеніміз дәлелденсе, онда бәрін өтеп береміз. Бұл мәселені көтеріп жүрген – сырттан келген ойыншылар, алайда оларға тиімсіз қаражатты жұмсай беруге қарсымын. Кезінде «Ақтөбе» де қаржылық қиындықтарға тап болып, легионерлеріне ақша төлей алмай жатқанда, 17 жастағы футболшылардан тұратын екінші құрамы келіп «Қайсарды» ұтып кеткен. Кәдімгі ауылдың жап-жас балалары, сол намыстың арқасы еді. Кейін «Қайсар» «Ақтөбенің» негізгі құрамын қонақта ұтып кетті. Сондықтан еліне, ауылына жаны ашитын адамдарды тәрбиелеу керек», – деді облыс басшысы бұдан әрі.
Осы тұста журналистер бірінші лигада ойнайтын «Қайсар Шиелі» командасының неге таратылғанын сұрады.
«Шиелідегі команданы жауып тастау деген ойда болған жоқ,– деп жауап берді бұған Нұрлыбек Машбекұлы. – Қайта жақсы стадион салып бердік, сонда дайындалып жүр. Біз келгенде, «Қайсар» бірінші лигада жүрген, біз сол қаражатпен-ақ клубты Премьер-лигаға шығардық. Турнирлік кестеде 6-шы, әрі кетсе 7-орында келе жатыр. Қолдау болмаса, жоғары лигаға қалай шығатын еді? Қолдау бар, стадионның салынуы осы сөзімізге дәлел. Бірақ клубтың құрамын қараймыз. Өз ойыншыларымызды, жастарымызды көптеп тартатын боламыз».
«Футболдың айналасында шу көп. Қазір Антикор бәрін жіті тексеріп жатыр. Тексеріс аяқталмайынша ашып айтқан дұрыс емес шығар. Бәрі нақтыланған соң, мән-жай анықталады», – деді облыс әкімі сөзінің соңында.
