Қызылорда облысында сапасы жақсы жолдар 92 пайызды құрайды
ҚЫЗЫЛОРДА. 20 қараша. Қызылорда облысында жақсы жағдайдағы жолдың үлес салмағы 92 пайыздан асып түсті. Бұл туралы облыс әкімі баспасөз қызметінің мәліметіне сүйенген rast.kz хабарлайды.
Биыл Қызылорда облысында республикалық және облыстық бюджеттен бөлінген 44 млрд 703 млн теңгеге 300 шақырым автомобиль жолы жөндеуден өтті. Облыс орталығының негізгі көшелері әуежайдан Бейбарыс сұлтан көшесіне дейінгі аралық, қалаға Шиеліден кіреберіс жол, Яссауи, Жаппасбай батыр магистралды көшелері, Тәуелсіздіктің 25 жылдығы даңғылы төрт жолақты болып кеңейтілді.
Облыс әкімі Нұрлыбек Нәлібаев бүгін Орталық коммуникациялар қызметі Қызылордада өткізген брифингте сөйлеген сөзінде аймақтағы жолдардың жайына да тоқталды.
Қызылорда қаласында 4 млрд 700 млн теңгеге Жанқожа батыр көшесі арқылы өтетін теміржол асты автожолы, Арал және Жаңақорған аудандарында теміржол үстінен аспалы көпірлер салынып жатыр.
Айта кетейік, жылдар бойы күн тәртібінен түспеген «Қызылорда-Жезқазған» автожолы Президенттің тікелей тапсырмасы бойынша қайта жаңғыртылуда. Жоба құны – 108 млрд 500 млн теңге. Қызылорда облысының аумағына тиесілі 216 шақырым жолдың 140 шақырымы жасалып бітті Қалған бөлігі 2026 жылы пайдалануға беріледі.
Бұдан басқа, көпшілікті толғандырған «Батыс Еуропа-Батыс Қытай» халықаралық дәлізінің Қызылорда қаласынан Ақтөбеге дейінгі аумағын төрт жолақтыға айналдыру мәселесі де Мемлекет басшысының тапсырмасымен шешімін тапты. Халықаралық дәліздің осы аумағын 1-санатқа ауыстыру бойынша «ҚазАвтоЖол» акционерлік қоғамы жоба-сметалық құжаттама әзірлейді.
Биыл Қызылорда қаласының шет аймақтарындағы ұзындығы 43 шақырым болатын 46 көшені орташа жөндеуге 3 млрд 217 млн 300 мың теңге бөлініп, жұмыс толық аяқталды.
Сонымен қатар, 29 шақырым болатын 16 көшеге жаяу жүргіншілер жолы салынды.
