USD
«Мемлекет қаржысына түсірілген фильмдер кинотеатр немесе телеарналар арқылы көрсетілудің орнына мұрағаттарда шаң басып жатады. Қазынадан бөлінген қаржы зая кетуде», – дейді белгілі медиаменеджер Құрманбек Жұмағали.
«Бізде «Қазақфильм» бар, бірақ оның павильондары киногерлерге қолжетімсіз. Есесіне, ол алаңда түрлі шоулар мен жарыстар түсіріледі. Мемлекет есебінен қаржы тарихи фильмдердегі костюмдерді тігуге де жұмсалады. Кейін ол киімдер тек қоймалардан орын табады. Проблемалар жеткілікті. Сондықтан жүйелі түрде шешімдер қабылдау керек», – деп жазды өз әлеуметтік парақшасында Құрманбек Жұмағали.
Ол киногерлер мен кинотеатрлардың арасындағы қарым-қатынаста бірінші тарап ұтылып отыр деп есептейді. Құрманбек Жұмағалидың айтуынша, кинокартинаның билеттері сатылымға түскен соң табыстың 55 пайызы кинотеатр иелеріне және жеке компанияларға кетеді.
«Біздің медиахолдинг тек сериалдарды ғана емес, қысқа және толықметражды фильмдерді де түсіріп жүр. Өткен жылы «Алтын адам» операциясы» фильмін түсіріп, кинотеатрлардан көрсеттік. Президент Ұлттық құрылтайда атап өткендей, кинотеатр иелері отандық фильмдерді экраннан көрсету үшін қомақты қаржы талап етеді. Біз бұл мәселеден тек журналист, медиаменеджер ретінде емес, кино түсіріп, үлкен экрандарға шығарған продюсер ретінде де хабардармыз. Яғни бұл проблемаға өзіміз де тап болдық», – деді «31» медиахолдингінің басшысы Құрманбек Жұмағали.
«31 арна» 2030 жылға дейін бизнес механизмдер арқылы отандық киноны қолдаушы арна ретінде қалыптасуды көздейді. Медиахолдинг басшысы бұл мақсатқа қол жеткізу үшін жетекші продакшндармен және Мәдениет және спорт министрлігімен әріптестік байланыс орнатуға дайын екенін жеткізді. Қазіргі кезде телеарна ақпараттық қолдау көрсету және ішінара немесе толық қаржыландыру тетіктері бойынша киногерлермен жұмыс жүргізіп жатыр.
«Жалпы, кинотеатрлардың жұмысы да ашықтық принципі бойынша ұйымдастырылуы тиіс. Онлайн режимде фильм қай уақытта көрсетіліп, қанша адамды қамтығанын, табыс көлемін көріп отыру қажет. Ең бастысы, отандық киноөндірушілерге басымдық беру керек. Бәлкім, отандық фильмдерге жазылу форматын қарастырып көрген жөн болар. Мысалы, АҚШ-та кинотеатрларға жазылу қызметтері бар. Айына шамамен 25 доллар төлесеңіз, кез-келген фильмді тамашалай аласыз. Неге біздің фильмдерге мұндай жазылымды ұйымдастырмасқа?», – деді Құрманбек Жұмағали.
