Өзбек сайттары қазақ қыздарының жеңісі туралы түк айтпады

ТАШКЕНТ. 3 маусым. Біріккен Араб Әмірлігінің Дубай қаласында аяқталған бокстан Азия чемпионатының қорытындысын жариялаған өзбек сайттары Қазақстан қыздарының ондағы теңдессіз жеңісі жайлы бір ауыз сөз де айтқан жоқ. Бұл туралы rast.kz хабарлады.

Өзбекстанның, мысалы, CentralAsia.uz сайты Дубайда Өзбекстан әйелдер құрамасының 8 медаль жеңіп алып, командалық 2-орын алғанын ғана атап өтті. Хабарда 1 алтын, 5 күміс және 2 қола медальге қол жеткізген өзбек қыздарының командалық есепте екінші болғандары айтылады. Алайда, 8 алтын, 1 күміс және 1 қола медаль алған қазақ қыздары туралы жұмған ауыздарын ашпайды, ләм-мим деп тіл қатпайды.

Өзбек елінің басқа ақпарат құралдары да осы сораппен кетіп қалған. Чемпионатқа өздерінен басқа ешкім қатыспаған сияқты.

Ал жоғарыдағы суретте Өзбекстан құрамасының шырайлы (широйлиқ – сұлу) қыздары бейнеленген.