USD
ЖОСАЛЫ. 10 сәуір. Қызылорда облысының әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай бүгін Қармақшы ауданында болды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Ол аймақ басшысы Нұрлыбек Нәлібаевтың тапсырмасымен Қармақшы ауданына барған жұмыс сапарында әлеуметтік нысандарды аралап шықты.
Алдымен «ІІІ Интернационал» ауылындағы денешынықтыру-сауықтыру кешеніне аялдады. Заманауи талаптарға сай салынған нысанды 2024 жылы «Астана Сервис LTD» ЖШС пайдалануға берген болатын. Құрылысына 409 млн теңге қаралған кешенде бүгінде ауыл тұрғындары, әсіресе мектеп оқушылары тұрақты түрде спортпен шұғылданады.
Әкімнің орынбасары бұдан әрі №284 мамандандырылған мектеп-лицей-интернат жұмысымен танысты. 120 орынға арналған білім ордасының оқу корпустары, жатақхана, асхана және спорт алаңдары бар.
Қайрат Нұртай жұмыс сапары кезінде Жосалы кентіндегі «Руханият орталығына» арнайы ат басын бұрды. Екі жыл бұрын пайдалануға берілген орталықта аудандық кітапхана, тарихи-өлкетану музейі, архив, ардагерлер кеңесі, жастар орталығы және қоғамдық ұйымдар орналасқан.
Қармақшы ауданында 2023-2024 жылдары 207 пәтерлік 103 тұрғын үй сатып алынып, кезекте тұрған азаматтарға берілсе, былтыр тағы 30 тұрғын үй табыс етілген. Сапар сорабында әлеуметтік осал топтарға арналған тұрғын үйлердің қазіргі жай-күйі де назардан тыс қалмады.
