USD
ЛИВЕРПУЛЬ. 15 қыркүйек. Англияның Ливерпуль қаласында бүгін түн ортасы ауа мәреге жеткен World Boxing ұйымының бірінші әлем чемпионатында бокстан Қазақстан ерлер және әйелдер құрамасы жалпы командалық есепте бірінші орынды жеңіп алды. Бұл туралы rast.kz хабарлайды.
Тұңғыш турнирде қазақ былғары қолғап шеберлері арасында финалға шыққан сегіз атлеттің жетеуі қарсыластарынан басым түсіп, чемпион атанды. Тіпті жеңіліп қалды деп саналған жалғыз боксшымыздың өзі әріптесінен төмен өнер көрсеткен жоқ. Бұдан бөлек, тағы екі спортшымыз осының алдында ғана қола медальды қанағат тұтып, жартылай финалда қалған болатын. Сөйтіп, қазақ саңлақтары 7 алтын, 1 күміс, 2 қола, жалпы саны 10 медальмен чемпионаттың жалпы көшін бастады. Екінші орынға табан тіреген Өзбекстан құрамасы 6 алтын, 2 күміс, 3 қола, жалпы саны 11 медаль жинады. Үндістан құрамасы 2 алтын, 1 күміс, 1 қола, жалпы саны 4 медальмен үшінші орынға жайғасты. Бұдан әрі Бразилияда 1 алтын, 3 күміс, Польшада 1 алтын, 2 күміс медальдан бар.
Чемпионатта жеке әйелдер құрамасы 3 алтын, 1 күміс, 2 қола медальмен бірінші орынға шықса, ерлер 4 алтын медальмен екінші орынға орналасты.
Бірінші орындағы Өзбекстан құрамасына 6 алтын медальді түгел ерлер әкелді.
Турнирде Қазақстанға бірінші алтын медальді 50 келіге дейінгі салмақтағы Санжар Тәшкенбай әперді. Ол моңғол моңғолиялық Баттулга Алдархишигпен қолғап түйістіріп, барлық раундта да басымдық көрсетті. Сөйтіп, Серік Сәпиевтен кейін екі дүркін әлем чемпионы атанған екінші боксшы болды.
Содан кейін бастаманы 55 келіге дейінгі салмақтағы Махмұд Сабырхан көтеріп әкетті. Ол испан Рафаэль Лосано Серраноны бет қаратпай жеңіп, қазақстандықтар қатарындағы әлемнің екі дүркін чемпионы санын тағы бір атлетке көбейтті.
Келесі алтын медальды команда қоржынына 21 келіге дейінгі салмақ дәрежесіндегі Алуа Балқыбекова салды. Ол түріктің мықты боксшысы Бусеназ Чакыроглумен жұдырықтасты. Шайқастың бірінші раундында біздің қыз 3:2 етіп ұтса, қалған екі раундта да 4:1 деген есепті берік ұстады. Осының арқасында бір жылдың ішінде екінші рет әлем чемпионы атанды.
Бұдан кейін 65 келіге дейінгі салмақтағы Аида Әбікеева өзбек спортшысы Навбахор Хамидовамен беттесті. Тартысты өткен шайқаста өзінің артықшылығын көрсете білген қазақ қызы жеңіске жетіп, екі сапар жаһан чемпионы атанғандар мөлшерін көбейте түсті.
Ал 70 келіге дейінгі салмақта күш сынасқан 19 жасар Төрехан Сабырхан алтын жүлделер санын бесеуге жеткізді. Осыдан бұрын екінші рет әлем чемпионы атанған Махмұдтың інісі рингте өзін өзгеше ұстайтын жапон бокшысы Севон Окадзавамен кездесті. Күткендегідей, Күншығыс елінің өкілі шаршы алаң төрінде лақтай ойнақ салып, қашып жүру әрекетін мұнда да көрсетті. Оны қуалаумен болған біздің бағлан төрешілер шешімімен алғашқы раундта 1:4 есебімен есе жібергенімен, қалған екі раундта соның есесін қайтарды. Сөйтіп, бір күнде бір үйдің екі ұлы әлем чемпионы атанды.
Әйелдердің 70 келіге дейінгі салмағындағы Наталья Богданова да сенімді ақтады. Ақтық сында ол аустралиялық Лекейша Перголитимен жұдырықтасты. Үш раунд бойы сенімді өнер көрсеткен қазақстандық спортшы төрешілердің бір ауызды шешімімен жеңіске жетті.
Турнирдің ең соңғы 92 келіден ауыр салмағының финалдық жекпе-жегінде біздің құраманың капитаны Айбек Оралбай мен өзбек Жахонгир Зокиров алтын медальді сарапқа салды. Онда біздің бағлан 3:2 есебімен ұтты. Төрешілер оның қарсыласы бірінші раундта – 3:2, екінші раундта 4:1 етіп ұтты деп есептеді. Ал ақырғы раундта Айбекке 4:1 есебімен жеңіс берді. Ал негізінде қазақ боксшысы алдыңғы екі раундта да қарсыласына есе жіберген жоқ.
Осы Айбектің жеңісі Қазақстанның ерлер және әйелдер құрама командасының жалпы есепте бірінші орынға шығуына тікелей себеп болды.
Ақтық сында еліміздің ең атақты боксшысы, әлемнің үш дүркін чемпионы Назым Қызайбай (48 кг) ғана төрешілер шешімімен алтын медальден қағылды. Ол шын мәнінде үндістандық Минакши Минакшиден жеңілмеген еді.
Бұлардан басқа Виктория Графеева (60 кг) мен Елдана Тәліпова (+80 кг) қола медальдің иегерлері атанды.
Сонымен, қазақстандық боксшылардың нәтижелері мынадай:
50 келі: Санжар Тәшкенбай – алтын медаль
55 келі: Махмұд Сабырхан – алтын медаль
70 келі: Төрехан Сабырхан – алтын медаль
90 келіден ауыр: Айбек Оралбай – алтын медаль
51 келі: Алуа Балқыбекова – алтын медаль
65 келі: Аида Әбікеева – алтын медаль
70 келі: Наталья Богданова – алтын медаль
48 келі: Назым Қызайбай – күміс медаль
60 келі: Виктория Графеева – қола медаль
+80 келі: Елдана Тәліпова – қола медаль
World Boxing федерациясының аясында тұңғыш рет ұйымдастырылған бұл Әлем чемпионаты Қазақстан үшін тарихи додаға айналды. Жеті алтын медаль жеңіп алған біздің құрама қазақ боксының әлемдік аренадағы мәртебесін тағы бір мәрте дәлелдеді.
