Бүгін Түркістан облысында карантин енгізілді
ТҮРКІСТАН. 19 сәуір. Бүгіннен бастап Түркістан облысында карантин енгізілді. Бұл туралы zakon.kz хабарлады.
Азық-түлік және киім нарықтарының жұмысы, сондай-ақ үй тауарларын өткізу жұмыстары тоқтатылатын болады. Енді көршілес облыстармен шекарада санитариялық блок-бекеттер жұмысы күшейтіледі. Сонымен бірге қала аралық, аудан аралық және ауыл аралық қатынас шектеледі, қоғамдық және жеке көліктердің өтуі тоқтатылады.
Қоғамдық орындар мен демалыс орындары, саябақтар жабылатын болады.
Азық-түлік және киім нарықтарының жұмысы, сондай-ақ үй тауарларын өткізу жұмыстары тоқтатылатын болады.
Балалардың ойын алаңдарында, көп қабатты үйлердің аулаларында ойнауға тыйым салынады.
Отбасы мерекелерін, туған күндерін және үйлену тойларын тұрғылықты жері бойынша өткізу шектеледі.
Көшелерде және қоғамдық орындарда үш адамнан артық жиналуға тыйым салынады. 65 жастан асқан азаматтар үйден шықпай оқшаулануы тиіс.
Тұрғындарға қажетті азық-түлік пен дәрі-дәрмектерді сатып алу үшін олардың үйлерінің жанында орналасқан дүкендер мен дәріханаларда ғана жүруге рұқсат етіледі. Азық-түлік дүкендерінің жұмысы 09:00-ден 20:00-ге дейін шектеледі.
Өңірге қажетті тамақ өнімдері мен материалдарды, өнеркәсіп тауарларын, құрылыс, медицина және көктемгі егіс жұмыстарына арналған материалдарды тасымалдайтын рұқсат құжаттары бар көлік құралдары ғана кіріп-шыға алады. Сондай-ақ медициналық көмекке мұқтаж азаматтар кіруге, шығуға мүмкіндік бар.
Құрылыс индустриясы, көктемгі егіс, жұмыспен қамтудың жол картасы, тіршілікті қамтамасыз ету объектілері карантиндік режимге қарамастан штаттық режимде жұмыс істейтін болады.
