АҚШ Украина электр станцияларын бақылауына алғысы келеді
УАШИНГТОН. 20 наурыз. АҚШ президенті Дональд Трамп қауіпсіздік мақсатында Украинадағы атом электр станцияларын өз елі басқаруға алуын ұсынды. Бұл туралы UNIAN ақпарына сүйенген rast.kz хабарлайды.
Кеше, 19 наурыз, сәрсенбі күні Трамп пен Украина президенті Володимир Зеленськийдің телефон арқылы сөйлескенінен кейін көп ұзамай АҚШ мемлекеттік хатшысы Марко Рубио мен Ұлттық қауіпсіздік жөніндегі кеңесші Майкл Уольц Ақ үй басшысының атом электр станциясын АҚШ меншігіне беру Украинаның энергетикалық инфрақұрылымы үшін ең жақсы қорғаныс болатыны туралы сөзін жеткізді. Мұндай жағдайда Кремльдің диктаторы оны атқылауға мүлде бата алмаған болар еді.
Рубио мен Уольцтың айтуынша, Трамп өз сөзінде «керемет әңгіме» деп атаған сөйлесу кезінде АҚШ-тың «электр қуаты мен коммуналдық қызмет саласындағы тәжірибесін пайдалана отырып, осы зауыттарды пайдалануда үлкен көмек көрсете алатынын» айтты.
Сондай-ақ АҚШ әкімшілігінің шенеуніктері Володимир Зеленський Киевке қосымша Patriot әуе қорғаныс жүйелерін беруді сұрағанын айтты. Рубио мен Уольц Ақ үй басшысының «бұл мәселе бойынша жұмыс істесуге келісім бергенін, қолжетімді нәрсені тауып бере алатынын, оны Еуропадан алып беретінін» айтқанын жеткізді.
Рубио мен Уольцтың айтуынша, екі лидер Курск облысындағы ахуалды да талқылап, «соғыс алаңындағы жағдайдың дамуына қарай қорғаныс ведомстволары арасында тығыз ақпарат алмасуға» келісті.
Украина президенті Трамппен жүргізілген әңгімесін «позитивті, өте мазмұнды және ашық» деп атады. Зеленськийдің айтуынша, ол америкалық әріптесіне Сауд Арабиясындағы «украиналық және америкалық командалардың жұмысын нәтижелі бастағаны үшін» алғысын білдірді.
Киев энергетикалық инфрақұрылымға шабуылдарды тоқтатуға келісті. Володимир Зеленський Уашингтонның энергетикалық және азаматтық инфрақұрылымға шабуыл жасауды тоқтату туралы ұсынысын қолдайтынын айтты. «Америкалық тарап та майдан шебінде сөзсіз атысты тоқтатуды ұсынды, Украина да бұл ұсынысты қабылдады. Біз мұны жүзеге асыру үшін жұмысты жалғастырамыз», – деп жазды ол әлеуметтік желіде.
Дональд Трамптың айтуынша, оның Володимир Зеленськиймен «өте жақсы телефон сөйлесуі» шамамен бір сағатқа созылған. Ол әңгіменің басым бөлігі Ресей президенті Владимир Путинмен «Ресей мен Украинаның талаптары мен қажеттіліктерін үйлестіру» жөніндегі кешегі келіссөздерді талқылауға арналғанын атап өтті.
