Бокс: Аида Әбікеева еліміз қоржынына үшінші алтын медаль салды (видео)
БЕЛГРАД. 16 наурыз. Сербияның Ниш қаласында өтіп жатқан бокстан әйелдер арасындағы чемпионатында Аида Әбікеева командаға үшінші алтын медальді алып берді. Бұл туралы vesti.kz дерегіне сүйенген rast.kz хабарлайды.
Біріншіліктің 63 келіге дейінгі салмақтың финалында тай Тананьо Сомеукпен қолғап түйістірген Аида Әбікеева 5:0 есебімен ұтып, Қазақстанға үшінші алтын медальді алып берді.
Бұған дейін 48 келіге дейінгі салмақта Назым Қызайбай, 50 келіге дейінгі салмақта Алуа Балқыбекова алтын медаль жеңіп алған болатын. Ал 60 келіге дейінгі салмақта Виктория Графеева күміс медальді қанағат тұтты.
Алда бізді енді Елдана Тәліпова (+81 кг) чемпиондық үшін таласатын финалдық жекпе-жек күтіп тұр.
Еске сала кетейік, Президент Қасым-Жомарт Тоқаев әлемнің үш дүркін чемпионы атанған Назым Қызайбайды бұл тарихи жеңісімен құттықтады. Ол ерлер арасында да, әйелдер арасында да мұндай атаққа жеткен бірінші атлет болып отыр.
