АҚШ Қорғаныс министрі Қытаймен соғысуға дайын екенін айтты
УАШИНГТОН. 6 наурыз. Пентагон басшысы Пит Хегсет АҚШ армиясының Қытаймен соғысудан қорықпайтынын мәлімдеді. Бұл туралы New York Post ақпарына сүйенген rast.kz хабарлайды.
«АҚШ Қытаймен соғысуға дайын», – деп хабарлады Қорғаныс министрі Пит Хегсет Бейжіңнің АҚШ-пен соғыстың қандай түріне де дайын екенін мәлімдегенінен кейін.
Мәлімдеме Қытай елшілігінің X әлеуметтік желісіндегі ресми аккаунтында жарияланды. Онда Қытай билігі АҚШ-пен кез келген қарама-қайшылық түрінде, – мейлі ол тариф болсын, экономикалық соғыс болсын немесе кез келген басқа соғыс болсын, – бәрінің де «соңына дейін» күресуге дайын екенін баяндады.
«Біз де дайынбыз», – деді Пит Хегсет Fox News арнасында Қытайдың кез келген «соғысқа» және «соғысуға дайынбыз» деген мәлімдемесіне түсіндірме беріп.
Ол АҚШ-тың «күшті болуының» маңызы зор екенін атап өтті.
«Бейбітшілікке құштарлар соғысқа дайындалуы керек… Міне, біз неге әскерімізді қалпына келтіріп жатырмыз? Міне, біз неге жауынгерлік рухта болуды қалпына келтіріп жатырмыз? Біз идеологиялары мүлде басқа, күшті әрі ұдайы өсіп келе жатқан елдердің қатысуындағы қауіпті әлемде өмір сүріп келеміз… Олар қорғаныс шығындарын, заманауи технологияларды тез ұлғайтып жатыр, олар Америка Құрама Штаттарын топ басынан ығыстырып жібергісі келеді… Егер біз Қытаймен соғыстың алдын алғымыз келсе, күшті болуымыз керек», – деді Пентагон басшысы.
Еске сала кетейік, АҚШ президенті Дональд Трамп Канада мен Мексика, сондай-ақ Қытай тауарларына кең ауқымды баж салығын салған болатын. Қытай бұған тез жауап қайтарып, кеше Құрама Штаттармен соғыстың қандай түрі болса да, соңына дейін шайқасуға дайын екенін білдірген еді.
