USD
ПАРИЖ. 6 наурыз. Франция президенті Эммануэль Макрон халыққа үндеу арнап, Украинаны ақырына дейін қолдайтынын мәлімдеді. Бұл туралы The Moscow News ақпарына сүйенген rast.kz хабарлайды.
Француз лидері үндеуінде көп мәселені қозғады, соның ішінде қазір бүкіл Еуропаға қауіп төндіргелі тұрған «чуманың» қайда екенін айтты. Ал оба ауруын жеңу үшін кәрі құрлық түгел бас көтеріп, өзара бірігуі керек. Оның басы алдымен Украинаны империялық пиғылдағы Ресей басқыншылығынан қорғау болмақ.
Макронның үндеуінде Ресейдің Франция мен бүкіл Еуропаның қауіпсіздігіне қауіп төндіретінін мәлімдегені атап өтілді. Ол осы ретте Украинадағы соғыстың Еуропаның барлық елдерін шарпып кететінін баса айтты.
«Егер бір ел Еуропадағы көршісіне ешбір жазаға ұшыраудан қорықпай айды-күннің аманында басып кіре беретін болса, онда бұдан былай ешкім де ештеңеге сенімді бола алмайды. Ресейден үлкен қауіп бар және оның кесірі Еуропа елдеріне де қатты тиеді», – деді ол.
Макрон сондай-ақ Украинада алдын ала белгілі бір шарттар мен қауіпсіздік кепілдіктеріне келісіп алмай тұрып атысты тоқтатуға болмайтынын айтты. Ол мұндай идеяның Украина мен Еуропа елдері үшін тиімді болатынын жоққа шығарды. Француз президентінің ойынша, «Ресей диктатурасының қол астында бейбітшілікке қол жеткізу мүмкін емес». Ол сонымен бірге, Украинада тұрақты бейбітшілік орнатудың барлық нақты қадамдарына қолдау көрсетінін атап өтті.
«Бейбітшілік орнатуға ықпал ететін барлық бастамалар дұрыс бағытқа қарай жылжиды, сондықтан мен бүгін кешке соған дауыс бергім келеді», – деді Макрон.
Ол бұдан бөлек, Украинаға Еуропа елдері әскерлерін жіберу идеясын еске алды. Бірақ бұл тек елде ұрыс қимылдары тоқтағаннан кейін ғана қолға алынады.
Сонымен қатар, Франция президенті келесі аптада Парижде Украинада бейбітшілік орнатуға кепілдік беруге дайын елдердің штаб басшыларын жиналатынын баяндады.
Макрон өз сөзінде Францияның ядролық қаруы болуына байланысты оның Еуропа қорғанысында ерекше мәртебеге ие екенін атап өтті. Ол ядролық қарусыздану мәселесіне келгенде «шешім әрқашан президенттің қолында болды және солай болып қалады» деді.
Франция президенті еуропалық одақтастарды қорғау үшін Францияның ядролық тежеу құралын қорғау жөнінде стратегиялық пікірталас өткізуді ұсынды. Ол Париждің еуропалық серіктестерінің бұдан былай АҚШ-тың тежеу күшіне тәуелді болмауын қалайтынын жеткізді. Осы санатта Украинаны да ядролық қарумен қолдау жоспары бар, қажет болған жағдайда сол қаруды оның өзіне беруге де болады.
Макрон өз сөзінде Франция мен басқа да Еуропа елдерінің қорғанысына қосымша инвестициялар жарияланғанын баяндады. Ол ертең Брюссельде Еуропа одағы басшыларының арнайы саммиті өтетінін еске салды.
Бұған дейін француздардың 60 пайыздан астамы Украинаға әскери көмек көрсетуді жалғастырып, бітімгершілік күштерін жіберуді жақтайтыны белгілі болған. Франция тұрғындары сондай-ақ Украина президенті Володимир Зеленськиймен кездесу кезінде АҚШ президенті Дональд Трамп әдейі жанжал шығарды және АҚШ бұдан былай өздеріне одақтас емес деп есептейді.
Бұдан бөлек, Аустралия премьер-министрі Энтони Албанес өз елі Украинаны қолдайтынын және бітімгершілік әскерлерін жіберу мүмкіндігін қарастыруға дайын екенін айтты. Ал Италия мұндай қадамнан бірден бас тартты.
