Қызылорда облысы жылу беру маусымын жақсы дайындықпен қарсы алды
ҚЫЗЫЛОРДА. 9 қазан. Қызылорда облысының коммуналды саласы алдағы жылыту маусымын биыл тыңғылықты дайындықпен бастады. Бұл туралы облыс әкімі баспасөз қызметінің ақпарына сүйенген rast.kz хабарлайды.
Кеше Үкімет отырысынан кейін Қызылорда облысының әкімі Нұрлыбек Нәлібаев шұғыл жиын өткізіп, жылу беру маусымының жайын тағы талқыға салды. Жиын күн тәртібіне бұған қоса мемлекеттік орман қорын ұлғайту мәселелері де қойылды. Оның барысында тиісті басшыларға нақты тапсырмалар жүктелді.
«Жылу беру маусымының кедергісіз өтуі өте маңызды. Биыл Үкімет дайындық жұмыстарына жан-жақты қолдау көрсетіп, жобаларды іске асыруға қажетті қаржы бөлді.
Өткен аптадағы көшпелі мәжілісте барлық жауапты мекемелерге дайындық жұмыстарын сапалы ұйымдастыру бойынша тиісті тапсырмалар берілген болатын. Олардың дер кезінде, сапалы орындалуын қатаң бақылау керек. Әлеуметтік нысандардың жауапты маусымға дайындығы баяу жүруде.Білім, денсаулық сақтау, мәдениет, спорт басқармалары, әлеуметтік нысандар қазандықтарының толық дайындығы мен отын қорының жасақталуын қатаң бақылауға алыңыздар». – деді облыс әкімі.
«Өткен жылу беру маусымында қаладағы КСК-сы жоқ тұрғын үйлерді жылуға қосуда бірқатар мәселе туындады. Мұндай жағдай биыл қайталанбауы тиіс.
Биыл Қызылорда қаласындағы 187 көп қабатты тұрғын үйді ыстық сумен қамту жоспарланған, Үкімет резервінен 11 млрд теңге бөлінген. Жұмысты 15 қазанға дейін аяқтауды тапсырдым. Берілген тапсырма уақытылы орындалуы керек», – деді Нұрлыбек Нәлібаев бұдан әрі.
Жиында Қызылорда қаласы және аудан әкімдеріне көмір қорын жеткілікті етіп жасақтау, үздіксіз және қауіпсіз газ отынымен қамтамасыз ету міндеттелді. «Қазақ Газ Аймақ» Қызылорда өндірістік филиалының директорына әр аудан орталығынан апаттық-диспетчерлік қызмет құру тапсырылды.
