Брюссельде Астана хабының жұмысы үлгі етілді
АСТАНА. 5 наурыз. Брюссельде ЕО елдері Астана мемлекеттік қызмет хабы жұмыс тәжірибесін талқылады. Бұл туралы Астана мемлекеттік қызмет хабының баспасөз қызметіне сілтеме жасаған rast.kz хабарлады.
«Брюссельде «Орталық Азиядағы мемлекеттік қызметті жетілдіру мақсатындағы әріптестік – Қазақстанның рөлі» атты дөңгелек үстел өтті. Оның жұмысына Қазақстанның, Қырғызстанның өкілетті органдары, Бельгия үкіметі, Еурокомиссия, БҰҰ, Қазақстанның және ЕО мүше елдер дипломатиялық миссия өкілдері, Астана мемлекеттік қызмет хабы делегациясы қатысты», – делінген хабарламада.
Брюссельдегі БҰҰ Даму бағдарламасы өкілдігінің директоры Барбара Песке-Монтейро өз сөзінде Астана хабы тұғырнамасы мемлекеттік қызмет саласында тәжірибе алмасып, ынтымақтастықты нығайту үшін «ғажайып мүмкіндік» екенін айтты. Ол, әсіресе, жаңа технологиялар дамуы мен цифрландыру кезеңінде осындай біріктіруші тұғырнама айрықша маңызды екенін әңгімеледі. Өйткені, «сан қырлы мемлекеттік қызмет жүйесі әртүрлі құралдарды қажет етеді, ал іргелі жұмыс істеу тәсілдері – әркімде әртүрлі», – деді Песке-Монтейро.
Астана мемлекеттік қызмет хабы басқарушы комитет төрағасы Әлихан Байменов қазіргі таңда хаб көп жақты жаһандық тұғырнама ретінде 42 қатысушы-ел мен 55 институтты ұйымның жұмылдырылатынын жеткізді.
Бельгия корольдігіндегі Қазақстан елшілігі кеңесші-уәкілі Ерболат Сембаев өз сөзінде «мемлекеттік басқару сапасы көп жағдайда кадрлерді дайындау сапасымен анықталатынын» айтты. Осы контексте Қазақстан мен БҰҰ Даму бағдарламасының кең ауқымды жобасы – Астана мемлекеттік қызмет хабы жұмысы өте өзекті екенін атап өтті. Кеңесші-уәкіл өз сөзінде 15 наурызда 25 мемлекет пен 5 халықаралық ұйым Астана хабын құру туралы декларация қабылдағанына 7 жыл толатынын хабарлады.
Талқылау барысында Еурокомиссия мен бірақатар мемлекет өкілдері аймақтық ынтымақтастық тұрғысында Астана хабы жұмысын ұйымдастыру формалары мен тәсілдерін зерделеуге ықылас танытты. Жиынға қатысқан әртүрлі ел қатысушылары хаб жұмысына жоғары баға бере отырып, әрі қарай ынтымақтастықты дамытуға қызығушылық білдірді.
Сонымен бірге, қатысушылар мемлекеттік басқару саласындағы озық еуропалық тәжірибені зерттеу мен қолдану барысы бойынша пікір алмасты. Оған қоса, хабтың мемлекеттік қызмет саласында әлеуетті нығайту, зерттеулер жасау, білім мен тәжірибе алмасу бойынша жұмыстары мен жаңа сараптамалары қатысушылар назарына ұсынылды.
Тараптар ЕО елдерінің озық тәжірибесін таратуда және аймақ елдерінде тиімді мемлекеттік қызмет жүйелерін ілгерілету бойынша әріптестікті кеңейту жолдарын қарастырды. Еуропа одағы – Астана мемқызмет хабы құрылтайшыларының бірі. Қазіргі таңда Еуропа одағына мүше 11 мемлекет – Астана хабына қатысушы ел.
Бұл шараны Брюссельдегі БҰҰ ДБ өкілдігі Қазақстанның Бельгия корольдігіндегі елшілігінің қолдауымен өткізді.
