Ресейліктерді мемлекет насихаты жалықтырып бітті: жұрт ТВ-ға сенуден қалды
МӘСКЕУ. 26 желтоқсан. Ресей тұрғындары бұрынғысынша Кремльдің пропагандасына малданып, бас щұлғып отыра беруден бас тарта бастады. Бұл туралы The Moscow News ақпарына құлақ түрген rast.kz хабарлайды.
Ресейдің қуаты кеңес заманынан бері болмаған деңгейге дейін көтеріліп кеткен мемлекеттік насихат фабрикасы соңғы уақыттары аудиторияның сенімінен аса жылдам қарқынмен айырыла бастады. ТВ-арналар елдегі болып жатқан оқиғалар жөнінде «әділетті ақпарат» береді деп есептейтін азаматтардың үлесі соңғы 7 жылда екі есеге жуық қысқарған. Мұны ВЦИОМ желтоқсан айында жүргізген сауалдама көрсетіп отыр.
Қазіргі мезетте мемлекеттің толық бақылауындағы телеарналарға ресейліктердің тек 26 пайызы ғана сенеді. Бұл көрсеткіш 2019 жылы – 30 пайыз, ал 2016 жылы 46 пайыз болған.
ТВ-пропагандашыларға бұрынғысынша жастары ұлғайған ресейліктер ғана көбірек сенім білдіреді – 60-тан асқандардың 51 пайызы сондай. Жастары 24-ке дейінгілердің арасында телеарналар «объективті» ақпарлардың мәнбесі деп есептейтіндер 5 пайызға дейін түсіп кеткен, ал орта жастағылар (25-44) арасында бұл көрсеткіш 9-13 пайыздың маңайынан аспайды.
Сауалдама қорытындысына қарағанда, сондай-ақ ресейліктер арасында телеарналарды «жаңалықтардың басты мәнбесі» деп санайтындар ақырындап болса да азая түсуде. Олар қазір 40 пайызды құрайды. Бұл – 2021 жылға дейінгіге қарағанда 2 тармаққа төмен, ал 5 жыл бұрынғыдан 13 пайызға аз. Сол сияқты ресейліктердің 19 пайызы жаңалықтарға сайттарына сүйенеді, 14 пайызы әлеуметтік желілерден ақпар алады, 11 пайызы месенджерлерге қарайды.
Сонымен бірге ешқандай БАҚ-тарға сенбейтін, оның орнына «ас үйдегі» әңгімені қолай көретін адамдар қатары көбейіп келеді.
