Үндістан билігі елдің атын өзгертуге айрықша құштарлық танытып отыр
НЬЮ-ДЕЛИ. 7 қыркүйек. Үндістан премьер-министрі Нарендра Модидің кабинеті мемлекеттің атын өзгерту жөніндегі ұсынысқа бастамашылық танытып отыр. Бұл туралы The Moscow News ақпарына сүйенген rast.kz хабарлайды.
Үкімет мүшелері «Индия» атауының бұл ел Ұлыбританияның отарлық басқаруы кезінде пайда болғанын, сондықтан оның құлдықтың символы болып табылатынын алға тартады.
Енді Нарендра Моди басқаратын билік мүшелері алдағы 18-22 қыркүйек күндері өтуі жоспарланып қойылған парламенттің арнайы сессиясы кезінде мемлекеттің ресми атын Үндістаннан (Индиядан) «Бхарат» деп өзгерту жайында қарар енгізбек ниетте болып отыр.
Министрлер кабинетіндегі өз мәнбелеріне сілтеме жасаған Times Now басылымы «Бхаратия джаната парти» (Үндістан халық партиясы, ҰХП) партиясының лидерлері елдің атауын «Бхарат» деп өзгертуге қолдау білдірді. Партия атынан сайланған депутат Раджья Сабха Нареш Бансал жоғарғы палатаның жақында болып өткен сессиясында сөз сөйлеп, «Үндістан» атауының отаршылдық құлдықтың символы болып табылатынын және оның Конституциядан алынып тасталуы тиіс екенін баяндады.
«Бхарат атауын Үндістан деп британиялықтар ауыстырды. Конституцияның 1-бабында: «Үндістан дегеніміз – Бхарат» деп жазылған. Біздің еліміз мыңдаған жылдар бойы әлемге «Бхарат» атымен танылып келді… Бұл – елдің ежелгі санскрит мәтіндерінде кездесетін көне аты. «Үндістан» атауы отаршылдық басқару кезінде құлдықтың символы ретінде беріле салған», – деді Сабха.
Конституцияға сәйкес, елде бірі – ағылшын, екіншісі хинди депр аталатын екі ресми тіл бар. Мемлекет ағылшын тілінде – Үндістан, хинди тілінде – Бхарат болып аталады.
Хинди – елде ең көп тараған тіл, бірақ Конституцияға сәйкес, тағы 20 тіл ресми тіл ретінде белгіленген. Санскриттік «Бхарат» термині «ардақты» деген мағынаны береді.
Үндістанда осы кезге дейін бірқатар ежелгі атаулар тиесілі қалаларға қайтарылды. Мысалы, 1995 жылы Бомбей – Мумбай, 1996 жылы Мадрас – Ченнаи, 2001 жылы Калькутта – Колкату болып шықты.
