Эстония премьері Кая Каллас Ресейге сауда блокадасын жасауды ұсынды
ТАЛЛИНН. 9 қыркүйек. Кеше Эстония премьер-министрі Кая Каллас Ресеймен шекаралас елдердің бәріне оған сауда эмбаргосын енгізуге ұсыныс жасады. Бұл туралы The Moscow News дерегіне сүйенген rast.kz хабарлайды.
Оның айтуынша, сөз бірінші кезекте РФ санкцияланған тауарларды шекара арқылы алып өте алатын Польша, Литва, Латвия және Финляндия мемлекеттері жайында болып отыр.
Эстония милитаристік Ресейдің бейбіт Украинаға басып кіріп, кең ауқымды соғысты бастап кеткен күндерінен бері осындай позиция ұстап отыр, қазір бұрынғысынша «сауда блокадасын» жасау үшін жалпыеуропалық келісімнің керегі жоқ, деп есептейді Кая Каллас.
«Біз визаларға қатысты не істеп отырсақ, соны тауарларға да жасай аламыз», – деді премьер өз сөзінде.
Эстония ресейлік туристердің Шенген туристік визасы бойынша елге келуін бірінші болып жапты. Бұдан кейін Латвия, Литва және Финляндия соны қайталап шықты. Айта кетерлігі, қазір сауда эмбаргосына қатысты дәл мұндай ымыра жоқ. Мұнда түйінді нүкте Финляндияның позициясы болып тұр. «Басты мәселе егер біз мұны жасамасақ, жүктер әлдеқайда кетіп қалып жатады, ал біз өз кәсіпкерлерімізді жазалаудан арыға бара алмаймыз», – деді Кая Каллас.
Дәл қазіргі мезетте Еуропа одағы Ресейге өзінің 12-ші санкциялар пакетін әзірлеуге кірісті. Ол жылдың соңына дейін жарияланады.
