Түрікменстан Ресейдің газын Қытайға құбырмен айдаудан бас тартты
АШХАБАД. 13 тамыз. Түрікменстан өз жеріне жеткізілетін Ресей газын құбырмен Қытайға қарай айдауға келісім бермей отыр. Бұл туралы The Moscow News ақпарына сүйенген rast.kz хабарлайды.
«Кремльдің Қытайға мүмкіндігінше көбірек газ айдау үшін Орта Азияда «газ одағын» құру жөніндегі жоспарына ҚХР-ға тұрбамен ірі көлемде газ жіберуші мемлекет – Түрікменстан тарапынан қарсылық білдірілді», – делінген хабарламада.
«Түрікменстан өзі ҚХР-ға газ жіберіп отырған құбырға Ресейді қосуға ниетті болып отырған жоқ», – деп мәлімдеді Түрікменстан сыртқы істер министрлігі.
Мәскеудің Қазақстан мен Өзбекстанды қатарына қосып, «газ одағын» кеңейту турасындағы әрекеттері Түрікменстан мүддесіне тікелей залал келтіретін болып, бірқатар мәселелерді тудырып жіберді.
Қазір Түрікменстан, Қазақстан және Өзбекстан бірлесіп Қытайды газбен қамтамасыз етіп келеді. Осы мақсатта олар Түрікменстан мемлекеттік «Түрікменгаз» және Қытайдың CNPC компаниялары бірігіп салған газ құбырын пайдаланып отыр. Онымен жылына жіберілетін 55 млрд текше метр газдың 40 текше метрі түрікмен дәулетінің еншісін құраса, Өзбекстан мен Қазақстанның үлесіне тиеді.
Ал Ресейдің жоспарына Қазақстан мен Өзбекстаннан көп мөлшерде Қытайға газ жіберу кіріп отыр. Орыс «Газпромы» үшін Қытай рыногы қазір өте-мөте керек. Өткен жылы ресейлік компания шетелге КСРО-дан бергі уақыттағы ең төменгі мөлшерде газ жіберді. Сөйтіп, бар болғаны 50 млрд текше метр (Оданқ кезінде – 100 текше метр) көлемінде ғана жөнелтті. Биыл бұдан да түсіп кеткелі жатыр.
Еуропа елдері 2022 жылдың екінші жартысында газдан ажыратылғаннан кейін «Газпром» 1,3 трлн рубль шығынға ұшырады, сосын бюджет алдындағы салығымен есептесу үшін есепшотындағы запас қаржысының тең жартысын – 1 трлн рублін жұмсауға мәжбүр болды. Қытай биыл Ресейден 22 млрд текше метр ғана газ алмақшы. Бұл – РФ-ның соғысқа дейін Еуропа одағына жөнелтіп тұрған газының ауқымынан 7 есе аз.
Өткен жылы Ресейдің Қытаймен арада «Сібір күші-2» газ құбырын тарту жөніндегі ұсынысы әріптесі тарапынан қолдау таппады.
