Сексен әйел өлтірген «Сібір маньягы» кінәсін соғыста жуғысы келеді
ИРКУТСК. 15 қаңтар. 80-нен астам қыз-келіншекті өлтіргені үшін сотталған бұрынғы милиционер Михаил Попков Украинаға барып соғысқысы келетінін айтты. Бұл туралы «Тайга.инфо» хабарлады.
«Ангара албастысы» өзі зорлап, өлтірген әйелдер алдындағы күнәсін «арнайы әскери операцияда қан төгіп жуғысы» келеді.
Бірақ маньяк-милиционер 15 қаңтар күні этаппен Иркутскіге жөнелтілді. Себебі, ол сот процесі барысында тағы 2 әйелдің ажалына себеп болғанын мойындағасын, ісі қайта тергеуге жіберілді.
Журналистерге берген сұхбатында Михаил Попков: «Егер мен өзімде тап осындай тілек бар десем, ол да шіли шындық болып шықпайды. Өйткені, бұл, соғыс деген – қалай дегенде компьютерлік ойын да, әлдеқандай бір керім-керемет көркем кітап та емес. Ал егер нақпа-нақ, тура, шынайы айтар болсам, мен әлі аязды қаңтар-ақпанды өткеріп алуым керек. Мен үшін аяз – ең жаман нәрсе. Мен, бәлкім, соғысқа баруға ойланбастан-ақ келісетін шығармын. Тек қазір жылы баспанадан шығып, суық траншеяға топ ете қалуың қиын, оған және қанша адам сияды?», – деп сөзін тарқатты.
Сотталушының айтуынша, өзінде әскери-есепші мамандығы да бар, бірақ осы заманғы маман болу үшін тездетіп қайта бір оқып алуы керек.
Михаил Попков өзінің қылмыстарын 1992-2010 жылдары Ангарскідегі Орталық ауданның ішкі істер департаменті бөлімінде істеп жүрген кезінде жасаған. Ол өлтірген әйелдердің денелері Ангарск қаласының, сондай-ақ Ангар, Усоль және Иркут аудандарының территорияларынан табылған. Марқұмдардың көбі шешіндірілген болып шықты, денелерінен зорлаушылықтың белгілері табылған. Кейбіреулерінің ақшалары мен әшекейлері алынған.
Попковтың кейбір қылмыстарға қатысы барлығы молекулярлы-генетикалық сараптамалардан кейін 2012 жылы маусымда дәлелденген. 2020 жылы шілдеде ол Иркутскідегі №1 оқшаулағышқа (СИЗО) этаппен келтірілді. Осы жерде қайта тергеу басталды. Өйткені, ол 1995 және 1998 жылдары жасаған қылмыстарын жасырып қалған екен. Соңында бәрі 80-ге толды. Енді олардың қатарына тағы екі қылмыс қосылып отыр.
Михаил Попков бұған дейін өмір бойы түрмеде отыру жазасына кесілген болатын. Жазасын Мордовиядағы колонияды арнайы киім тігіп, өтеп жатты. Қазір соғысқа қатысу арқылы жазасын жеңілдеткісі, тезірек бостандыққа шыққысы келеді-міс.
