Жаңалықтар жаңғырығыТіршілік

Түрікменстанда Ниязовтың мүсіндері қоқысқа шығарып тасталды

АШХАБАД. 1 мамыр. Түрікменстанның бұрынғы президенті, марқұм Сапармурат Ниязовтың мүсіндері қажетсіз нәрсе ретінде күл-қоқыстарға шығарып тастала бастады. Бұл туралы Turkmen.news хабарлады.

Портал тілшілері ел байтағындағы мекемелердің бірінің ауласындағы күл-қоқыс салынатын жәшіктер жанынан түрікменбашы Сапармурат Ниязовтың бюстін тауып алған. Зерттей келгенде, экс-президенттің тас мүсіндері соңғы уақыттары керексіз зат ретінде мекемелер кеңсесінен шығарып тасталып жатқаны белгілі болды. Бірақ мұндай нұсқаудың жоғарыдан берілген-берілмегенін анықтау мүмкін болмаған.

«Марый велаятындағы ұйымдардың бірінің ауласынан әлдеқандай бір гипс мүсін табылған. Бірақ онда кімнің бейнеленгенін білу көп қиындық туғызбаған. Мұқият қараған адам оның тәуелсіз Түрікменстанның бірінші президенті Сапармурат Атаевич Ниязовтың кескіні екенін бірден ажырата алады», – делінген хабарламада.

Сапармурат Ниязов республиканы 1985-2006 жылдар аралығында басқарды. Бастапқыда ол Компартия Орталық Комитетінің бірінші хатшысы болса, кейін президент атанды, ал 1999 жылы мәңгі президент болып «сайланды».

Ниязовқа көзі тірісінде «Түрікменбашы», яғни «барлық түрікмендердің басшысы» атағы берілді. Сонымен бірге оған ұлт көсемі ретінде «сердар» (бізше – сардар, яғни қолбасшы) деген титул қоса таңылды. Сол кезде мемлекет басшысының ескерткіш мүсіні елдегі барлық мекемелердің кеңселерінде тұрды. Президенттің кескін-келбеті портртеттерден бөлек, түрікменнің қалы кілемдерінің бетіне тоқып салынды, олардың бәрі офистер мен сарайларға ілініп қойылды. Бұдан бөлек, президенттің профилі көрсетілген значоктарды шенеуніктер кәстөмдерінің өңірлеріне тағып алып жүрді.

Ашхабадта Ниязовтың Күнді айналып тұратын алтыннан құйылған алып ескерткіші де болып еді.

Бүгінде соның бәрі біртіндеп құрып келе жатыр.

«Құлан құдыққа құласа, құлағында құрбақа ойнайды» деген осы шығар…

Ниязов 2006 жылы кенеттен қайтыс болып кетіп, оның орнына Гурбангулы Бердымухамедов келді.

Тағы көрсету

Пікір қалдыру

Ұқсас мақалалар

Back to top button