42 500 теңгені заңсыз алғандар жазаланбайды – министр
АСТАНА. 20 сәуір. Еңбек және халықты әлеуметтік қорғау министрі Біржан Нұрымбетов елімізде 42500 теңгені заңды алған да, заңсыз алған да бір де бір адамның қылмыстық жазаға тартылмайтынын мәлімдеді. Бұл туралы zakon.kz хабарлады.
Әлеуметтік төлем 3 млн 960 мың адамға тағайындалды. Жалпы сомасы 157 млрд теңгені құрады.
«Жауапкершілік жөнінде. Өкінішке қарай, соңғы 4-5 күн бойы әлеуметтік желілерде, қоғамда 42 500 теңге алғандарды қылмыстық жауапкершілікпен жазалайды екен деген әңгіме көп таралуда. Құрметті азаматтар! Менің айтарым, бір де бір адам 42500 теңгені алғаны үшін, тіпті жіберген қатесі үшін қылмыстық жазаға тартылмайды, деді ол.
Төтенше жағдай салдарына байланысты өздерінің табысынан, жалақыларынан айырылғандарға арналған әлеуметтік төлем 3 млн 960 мың адамға тағайындалды. Жалпы сомасы 157 млрд теңгені құраған», – деді Нұрымбетов.
«Уайымдамаңыздар! Сізге төленді ме, алыңыздар, жаратыңыздар, деп қосты министр.
Неге біз ешкімді тексермейміз? Себебі, бұл әлеуметтік төлем – әлеуметтік бағыттағы төлем. Елде осындай төтенше жағдай болмаған күннің өзінде де бізде халықтың басым бөлігінің табысы аз екені түсінікті. Жалақы төмен. Зейнетақы мен жәрдемақылар жоғары емес. Сондықтан көпшілік осы төлемді алсам деген. Біз жаппай ешкімді тексеріп жатпаймыз. Жеке тұлғалар болсын, жеке кәсіпкер болсын – ешкімді де тексермейміз. Уайымдамаңыздар! Сізге төленді ме, алыңыздар, жаратыңыздар», – деді министр бұдан ары.
