Алматы соты Тимур Құлыбаев компаниясының ұлттық парктегі ғимаратын алып қойды
АЛМАТЫ. 9 желтоқсан. Сот экс-президенттің майлы жіліктердің басын бекем ұстаған тойымсыз күйеу баласы Тимур Құлыбаевқа қарасты «Кипрос» компаниясын ұлттық паркте орналасқан зәулім үйінен айырды. Бұл туралы «Адырна» дерегіне сүйенген rast.kz хабарлайды.
Негізінде, «Кипрос» ЖШС бизнестің әртүрлі саласындағы активтер мен инвестицияларды басқарумен айналысады.
«Алматының мамандандырылған ауданаралық экономикалық соты кәсіпкер Тимур Құлыбаевқа тиесілі компанияға қатысты істі қарады. Сотқа «Іле-Алатау мемлекеттік ұлттық табиғи паркі» республикалық мемлекеттік мекемесі жүгінген», – делінген хабарламада.
Сот материалдарына қарағанда, 2018 жылы 13 қарашада «Іле-Алатау мемлекеттік ұлттық табиғи паркі» республикалық мемлекеттік мекемесі мен «Кипрос» ЖШС өзара келісімшарт жасасқған. Соған сәйкес, «Іле-Алатау мемлекеттік ұлттық табиғи паркінің аумағында туристік кешен салуға» және туристік және рекреациялық қызметті жүзеге асыру үшін жер учаскесі компанияға 2062 жылдың 22 қазанына дейін жалға берілген. Ол жерде «Южная» туристік базасы салынған. Келісімшарт бойынша «Кипрос» ЖШС ол жерде туристерді қабылдауы қажет болған.
Ұлттық табиғи паркі сотқа жүгініп, РММ мен ЖШС арасындағы келісімді бұзуды; 1,1 гектар жерді қайтаруды; «Кипрос» ЖШС коттеджі өз қаражатына бұзуын сұрады. Талап-арызда компанияның ерекше қорғалатын аумақ туралы қолданыстағы заңнаманың талаптары, сондай-ақ жер учаскесін жалға алудың шарт талаптары сақталмай отырғанына сүйенген. Ал ол жерді жеке мақсатта пайдаланатын коттедж орналасқан.
Тексеріс барысында көрсетілген аумақтың мүлде туристерге арналмағаны белгілі болды.
Сот шешімімен «Іле-Алатау мемлекеттік ұлттық табиғи паркі» республикалық мемлекеттік мекемесінің талап арызы қанағаттандырылды. Осылайша РММ мен «Кипрос» ЖШС арасындағы 2018 жылдың 13 қарашадағы келісімінің күші жойылды. «Кипрос» компаниясы ұлттық парк аумағындағы жерді қайтарып, өз қаражатына коттеджді бұзады. Сондай-ақ қоқысты парк аумағынан шығаруға міндетті.
Сот шешімі заңды күшіне енген жоқ, тараптар апелляциялық шағым түсіруге құқылы.
