USD
АСТАНА. 22 қазан. Кеше Сыбайлас жемқорлыққа қарсы қызметтің бұрынғы Әділет министрі Марат Бекетаевты қамағаны белгілі болды. Бұл туралы ҚазТАГ ақпарына сүйенген rast.kz хабарлайды.
Нұрсұлтан Назарбаевтың баласы, яғни інісінің ұлы – Самат Әбіштің жақын досы болып табылатын экс-министрге «лауазымдық өкілеттіктерін асыра пайдаланды» деген күдік таңылып отыр.
Сол бойда интернетте оның қолға түсірілу жайы баяндалған ақпарат тарады. Онда 2023 жылғы 21 қазан күні сағат 5.30-да 1977 жылы 29 тамызда туған Бекетаев Марат Бақытжанұлы деген азаматтың қолға түсірілгені айтылған.
2016 жылғы қыркүйекте Әділет министрі болып тағайындалған Бекетаев 2022 жылғы қаңтардың басында басталған әйгілі Қаңтар оқиғасынан кейін орнынан алынып қалды. Ол сол уақытқа дейін өзін бақайшағына дейін «Ескі Қазақстан» деп аталатын тамыры жан-жаққа терең жайылып кеткен жемқор да әділетсіз жүйеге берілген адамы, сондықтан жаңа Мемлекет басшысы Қасым-Жомарт Тоқаевтың тапсырмаларын оншалықты қыстыра қоймайтын өркөкірек лауазымды тұлға екенін танытып үлгерді.
«Батыр Бекетаевтың» ең сорақы жанжалдарының бірі 2009 жылы көрініс берді. Сол кезде әділет вице-министрі болып жүрген ол араққа тойып алып, көлік жүргізіп келе жатқанында жол полицейлерінің қолдарына түсіп қалады. Алайда мұның ақырында араққұмар шенеунік емес, Назарбаев кланының мүшесін «қамап тастауға» жүректері дауалаған полицейлер қызметтерінен кетуге мәжбүр болды. Кейбір мәліметтерге қарағанда, шулы оқиғаның тап осылай аяқталуына жақында ғана Қаңтар оқиғасына байланысты тергеуге алынған Ұлттық қауіпсіздік комитеті төрағасының бұрынғы бірінші орынбасары Самат Әбіш қатты еңбек сіңірген көрінеді.
Бекетаевтың тағы бір жанжалды жайы молдованның ағайынды бизнесмендері Анатол және Габриел Статилерге қарсы сот процесімен байланысты. Аталмыш іс бойынша 2017 жылы Қазақстан Ұлттық қорының $22 млрд ақшасы бұғатталып қалып, мемлекет оны заң жағынан қорғауда орасан зор шығынға ұшырады.
Ал 2019 жылы Назарбаев өзінің президенттік өкілдігін тоқтатқаннан кейін Бекетаев жаңа Президент Қасым-Жомарт Тоқаевтың саясатын ашықтан-ашық мансұқ етуге анық нақты әрекеттер жасап бақты. Мысалы, 2019 жылдың 22 қарашасында ол Тоқаев қол қойған Назарбаевтың бірқатар салалардағы өкілеттілігін кеңейте түсуге бағытталған «Президенттің бірқатар актілерін өзгерістер мен қосымшалар енгізу туралы» жарлығына түсіндірме бере келіп, кадр мәселесі бойынша соңғы сөзді айту құқығы Қауіпсіздік кеңесінде (сол сәтте оны Назарбаев басқаратын) екенін мәлімдеген болатын. Сол жолы бұл мәселеге Президенттің баспасөз хатшысы Берік Уәлидің араласып, бәрінің ақ-қарасын айтып беруіне тура келген.
«Мен Әділет министрінің бұл пікірі дұрыс емес деп есептеймін. Бәлкім, журналистердің қысымымен Бекетаев сасып қалып, қате тұжырым жасаған да шығар, ең таңғаларлығы: мұндай деңгейдегі лауазымды тұлға өзінің функционалдық міндеттері шеңберіндегі кез келген мәселеге барлық уақытта біліктілікпен түсіндірме жасай алатын болуы тиіс қой», – деген еді Берік Уәли сонда Бекетаевтың мәлімдемесіне орай ҚазТАГ тілшісінің сұрағына берген жауабында түйінді кадрлық мәселенің бәрін Президенттің өзі шешетінін атап өте тұрып.
Еске сала кетейік, Бекетаев 21 қазан күні Президент Тоқаев жариялаған сыртқа заңсыз шығарылған активтерді қайтару науқаны аясындағы жемқорлық ісі бойынша құлып астына алынып отыр. Бекетаев қазір Қаңтар оқиғасына байланысты айыпты деп табылып, жазасын өтеп жатқан Ұлттық қауіпсіздік комитетінің бұрынғы бастығы Кәрім Мәсімовке жақын адамдардың бірінен саналады.
Атап өтейік, Қаңтар оқиғасына дейін Бекетаевтың кеңесшісі болған Жемқорлыққа қарсы әрекет жөніндегі ұлттық бюроның бұрынғы басшысы Талғат Татубаев бұрынғы сенатор, бұрынғы Антикор басшысы Қайрат Қожамжаровпен бірге қолдан құрастырылған талай ірі қылмыстық істерге қатысы бар тұлға саналады.
