Қазақстанның бұрынғы Ішкі істер министрі Ерлан Тұрғымбаев қамауға алынды
АСТАНА. 30 сәуір. Бас прокуратура бұрынғы Ішкі істер министрі Ерлан Тұрғымбаевтың қамауға алынғанын растаған мәлімдеме таратты. Бұл туралы Zakon.kz ақпарына сүйенген rast.kz хабарлайды.
Бұдан бір күн алдын әлеуметтік желілерде Қазақстанның бұрынғы Ішкі істер министрі Ерлан Тұрғымбаевтың ұсталғаны туралы ақпарат пайда болған еді. Осыған байланысты бүгін, 2024 жылдың 30 сәуірінде Бас прокуратура мәлімдеме жасады.
Таратылған мәлімдемеден Қазақстан Республикасының Бас прокуратурасы 2022 жылғы қаңтар оқиғасына қатысты қылмыстық істерді тергеуді жалғастырып жатқаны белгілі болды.
«Үстіміздегі жылдың 29 сәуірінде ауыр зардаптарға әкеп соққан билік пен лауазымдық өкілеттіктерді асыра пайдаланғаны үшін (ҚК-нің 362-бабы 4-бөлігі) Қазақстан Республикасының Қылмыстық іс жүргізу кодексінің 128-бабы тәртібінде ішкі істер экс-министрі Е.З.Тұрғымбаев ұсталды», – делінген Бас прокуратура хабарламасында.
Бұдан да бұрынырақта Бас прокуратура Қаңтар оқиғасы бойынша экс-министр Ерлан Тұрғымбаевтан жауап алынғанын баяндаған болатын. Сондай-ақ Бас прокуратура Алматы облысының Қарасай ауданына қарасты «Қошмамбет» ауылында орналасқан арнайы қабылдау жағдайында ұсталған азаматтарға азаптауды қолдану туралы іс бойынша дәлелдемелер жинаған.
Айта кетейік, Ерлан Тұрғымбаев 2019-2022 жылдары Ішкі істер министрі болып қызмет атқарды. Қаңтар оқиғасынан кейін министр лауазымынан кетіп, Қазақстан Президентінің кеңесшісі болып тағайындалды. Ал жарты жылдан кейін бұл қызметтен де босатылды.
