Украина АҚШ-пен бірге қазба байлық қорын құруға келіспеді
КИЕВ. 23 ақпан. Украина АҚШ-тың қазба байлықтар жөнінде ортақ қор құру жөніндегі ұсынысын қабылдамай тастады. Бұл туралы The Moscow News ақпарына сүйенген rast.kz хабарлайды.
«Украина АҚШ-тың пайдалы қазбалар жөніндегі келісімнің бөлігі болатын және америкалықтардың соғыстағы көмек шығындарын өтейтін 500 миллиард долларлық бірлескен қор құру туралы талабынан бас тартты», деп жазады Bloomberg.
«Киевтегілер қолдаудың нақты көлемі шамамен 90 миллиард долларды ғана құрайды деп есептейді және бұл Уашингтон жариялаған сомадан бес есе дерлік аз екенін алға тартады», дейді келіссөздермен таныс украиналық шенеунік.
Агенттікке тағы бір мәнбе келіссөздерге қатысушыларға мәміле жасау үшін көбірек уақыт қажет екенін айтты, өйткені АҚШ ұсынып отырған қазіргі келісім жобасында «күмәнді элементтер» бар және Украина президенті Володимир Зеленьский оны мақұлдауға дайын емес. Шенеуніктің айтуынша, бұған келешек әскери және қаржылық көмекке кепілдіктің жоқтығы кедергі болып отыр. Ол сондай-ақ Зеленьскийдің қазба байлық туралы келісімге Дональд Трамптың өзімен бірге қол қойғысы келетінін және бұл америкалық лидердің Ресей президенті Владимир Путинмен кездесуіне дейін болғанын қалайтынын айтты.
«Новини України» интернет басылымының мәнбелері Украинаның қор көлемін 100 миллиард долларға дейін азайтуды ұсынғанын және келісімнің нұсқасын АҚШ-тың арнайы өкілі Кит Келлогг арқылы ұсынғанын растады.
Киев сонымен қатар егжей-тегжейлерді талқылау үшін президенттердің келесі аптада Уашингтонда кездесуін сұрады. Басылым әңгімешісінің айтуынша, бұдан бірнеше күн бұрын Зеленьский әртүрлі ведомстволар басшыларымен кеңес өткізіп, «келісімді әлдеқандай бір жақсартылған түрінде жасап шығып, қол қоюға тура келеді» дегенді айтты.
22 ақпанда Трамп Америка Құрама Штаттарының Украинаға көмек көрсету үшін шамамен 350 миллиард доллар жұмсағанын айтты, сол күні Пентагон басқа санды атап, оның 183 миллиард доллар болатынын айтты, ал шын мәнінде шығын көлемі шамамен 58 миллиард доллар болыпты. Зеленьский америкалықтардың Украинаға қару-жарақ үшін 67 миллиард доллар және тікелей қаржылық көмек ретінде 31,5 миллиард доллар бергенін мәлімдеді.
21 ақпанда Киев Уашингтоннан минералдық ресурстарға қатысты келісімнің жаңартылған нұсқасын алды, бұл Зеленьский қабылдамаған бастапқы жобадан да қатқыл болды. Бұл жолғы құжат сирек кездесетін жерасты металдарын ғана емес, сонымен қатар газ бен мұнайды да қамтиды. Жаңа нұсқа Украина ресурстарын басқару үшін арнайы қор құруды ұсынады, оны бақылау толығымен АҚШ-қа жүктелмекші. Уашингтон сондай-ақ тараптардың жарналарын екіге бір қатынасында бөлуді талап етеді. Атап айтқанда, аталмыш қорға Украина өндірістен түскен кірістің үштен екісін, ал АҚШ үштен бір бөлігін аударатын болды. Шын мәнінде, америкалықтар қорға ештеңе де бермейді, ол Украинаға берілген қару-жарақтарды өздерінің жарналары санатына кіргізе салмақ. Сөйтіп, Украина байлығын тегін ала салмақшы болып отыр.
