USD
ЧЕРКЕССК. 25 қазан. Ресейдің Қарашай-Черкес автономиясының басшысы Рашид Темрезов шешен лидерінің 15-тегі ұлына мемлекеттік марапат тапсырып, айды аспаннан бір-ақ шығарды. Бұл туралы The Moscow News ақпарына сүйенген rast.kz хабарлайды.
Түрмеде шынжырлаулы жатқан адамды ұрған сотанақ мұндағыдарды да естен тандырған көрінеді. Сондықтан автономия төрағасы оны «Қарашай-Черкес республикасы алдында сіңірген еңбегі үшін» деген мемлекеттік орденмен наградтауға шешім қабылдапты. Ал марапат 15 жастағы жасөспірімге «ұлт аралық және өңір аралық бірлікті дамытуға, дәстүрлі ислам құндылықтарын нығайтуға қосқан жеке үлесі» үшін лайықты деп табылыпты-мыс. Мұны Темрезов өзінің телеграм-каналында жазды.
Осының қарсаңында, 24 қазан күні Татарстан райысы Рустам Минниханов «ұлт аралық және конфессия аралық татулық пен келісушілікті нығайтуға қосқан айтарлықтай үлесі» үшін Рамзан Кадыровтың ұлы Адамды «Дуслык» орденімен марапаттап, оны өзі Грозныйға әкеп тапсырып кетіп еді.
Сонда Құранды өртегені үшін ұсталып, Грозныйдағы уақытша ұстау оқшаулағышында қамауда отырған Волгоград тұрғыны Никита Журавельді тәртіп сақшыларының қамсауында келіп, ұрып кету «таңғажайып ерлік» болыпты бұлар үшін.
Мұның бәрі Шешенстан басшысы Рамзан Кадыровтың өз ұлы Адам Кадыровқа осы «ерлігі» үшін Шешенстан батыры атағын беруінен бастау алды.
Сол оқиғадан кейін Татарстан мемлекеттік кеңесінің депутаты Азат Хамаев өзінің біраз ашуын білдірген еді. «Біз қандай құқықтық алаңда өмір сүріп жатырмыз? РФ субъектісінің басшысы қамаудағкы адамды ұрғаны үшін өзінің ұлына Шешенстан батыры атағын береді», – деген ол. Алайда кейінірек бұл сөзін қайтып алды. Ал республика басшысы Минниханов мұны депутаттың жеке пікірі екенін айтқан болатын.
Айтқандай, Рашид Темрезовтің ұлты – қарашай. Өз тіліндегі аты-жөні – Рашид Борисбийни джашы Темирезланы. 1976 жылы туған. Республиканы 2011 жылдан бері басқарып келеді.
Қарашайлар мен Кабарды-Балқарияда тұратын малқарлар, негізі, бір халық болып саналады. Олар, қазақтар сияқты, түркі тілінің қыпшақ тілдері тобында сөйлейді.
