Науқастардың шақыртуына есекпен баратын медбикеге орден берілді
ТАШКЕНТ. 25 наурыз. Өзбекстан билігі пациенттер шақыртуына есек мініп барып тұратын медбикені екінші дәрежелі «Саломатлик» орденімен марапаттады. Бұл туралы өзбек сайттарына шолу жасаған rast,kz хабарлайды.
Podrobno.uz порталы атап өткендей, бұл жағдаят әлеуметтік желіде қызу талқыға түскен. Блогерлердің басым көпшгілігі биліктің бұл шешіміне айрықша ризашылық білдірген. Сонымен қатар, олардың арасында «түк пайдасы жоқ жылтырақ темір тапсырғанша, оған неге арнайы автомобиль бөлмеген?» деген сыңайда көңіл толмастық танытқан желі пайдаланушылар да кездескен. Оларды қолдаушылар аз болмаған.
Орденмен наградталып жатқан 54 жастағы медбике Холбика Бобоқулова Қашқадария облысының Чироқчи ауданындағы Даштқизил қишлоғында тұрады. Ол марапатты Наурыз мейрамының қарсаңында алған.
Сонау 17 жасынан бері медбике болып қызмет етіп келе жатқан Холбика Бобоқулованың осы саладағы еңбек өтілі биылғы жазда 37 жылға толады. Ол ауылдастарының үйлеріне ылғи есекпен барып, медициналық көмек көрсетіп тұратынымен де өңірге жақсы танымал болған.
«Қашқадариё янгиликлари» телеграм-каналының атап көрсетуінше, Даштқизил қишлоғында кейбір үйлердің қашықтығы 2 шақырымнан асып кетеді екен, ал кенттің өзі аудан орталығынан 30 шақырым алыста орналасқан. Медбике кейде Чироқчиге де есек мініп барып келе береді.
«Менің осыдан басқа ешқандай көлігім жоқ. Сондықтан мені пациенттер шақырған кезде, оларға тезірек жету үшін дереу есегімді ерттеп мініп аламын», – дейді медбике.
