Тұтқындағы кісіні ұрған Кадыровтың ұлы Шешенстан батыры атанды
ГРОЗНЫЙ. 7 қазан. Уақытша ұстау оқшаулағышында (СИЗО) жатқан Волгоград тұрғынын ұрған Адам Кадыров Шешенстан батыры атанды. Бұл туралы The Moscow News дерегіне сүйенген rast.kz хабарлайды.
«Рамзан Кадыровтың Құранды өртегені үшін қамалған Никита Журавельді уақытша ұстау оқшаулағышында ұрған он бес жасар ұлы Адамға Шешенстан батыры атағы берілді», – деді РФ мемлекеттік думасының депутаты Адам Делимханов.
Депутат аттасының бұл әрекетін «барынша сауатты, жан-жақты білімді және мақсаткер жасөспірімнің жарқын үлгісі» деп атап көрсетті. «Ол балаң кездерінен өзінің көшбасылық және ұйымдастырушылық қабілетін танытты, қашанда өзін дамытуға ұмтылды және ешқашан уақытын босқа өткізген емес», – деді Делимханов.
Рамзанның досы әрі құйыршығы сондай-ақ өзінің аттасы Адамның спорттағы «айрықша табыстары» жайлы айтып өтті. Қарап тұрса, жасөспірім бала «аралас жекпе-жектің беделді турнирлерінде бірқатар тамаша және талассыз жеңістерге жеткен» көрінеді. «Мен Адам Отанына адал да табанды қызмет ету арқылы өз халқы мен еліне орасан зор пайда әкеледі деп сенемін», – деді Делимханов соңында.
Еске түсіре кетейік, Шешенстанның серкесі Рамзан Кадыров 25 қыркүйек күні әлеуметтік желіде өз ұлының Құранды отқа жаққаны үшін уақытша ұстау оқшаулағышына қамалған Никита Журавель деген біреуді ұрып жатқаны түсірілген видеоны жариялады. Ол өз сөзінде ұлының бұл әрекетін мақтаныш ететінін айтып өтеді.
Видео сол бойда үлкен қоғамдық резонанс туғызды. Пікір білдірушілердің дені Шешенстан басшысы ұлының бұл әрекетін қатты сынға алды. Олар онсыз да қамауда жатқан, қолдарына кісен салынған адамды ұра салудан оңай нәрсе жоқ екенін баяндады. «Әрине, сен шешен лидерінің ұлы болсаң, жасыңның нешеде екеніне қарамастан, шешен жерінде қамауда жатқан кімді болса да ұра аласың. Мұның мақтан тұтатын ештеңесі жоқ», – десті олардың басым бөлігі. «Дон-дон тағы да әдеттегідей далбасалап кетіпті. Осының ақылы толық екеніне күмәндімін. Мұның орнына ол екі бүйрегінің қатерден аман шығу жағын ойламай ма?», – дегенді жеткізді тағы бір топ.
Әлеуметтік желідегілердің басым бөлігі осы әрекеті үшін Адамды қылмыстық жауапқа тарту керектегі жөніндегі пікірге ұйыды.
Алайда Шешенстан құқық қорғау органдары болған оқиғаға қатысты қылмыстық іс қозғаудан бас тартты. Грозный полициясы Адам Кадыровтың 15-те екенін, сондықтан жасы қылмыстық жауапкершілікке тарту мөлшеріне келмегенін мәлімдеді.
Кремльдегілер де уақытша ұстау оқшаулағышында жатқан қорғансыз Журавельдің таяққа жығылу фактісіне орай түсіндірме бергілері келмеді. Президент Владимир Путин ұлының бейбастақ әрекеті үшін Рамзан Кадыровты жазалай қоймады.
Бұдан бұрын Адам мен оның 17 жасар ағасы Ахмат «Лаңкестікпен күресте көзге түскені үшін» медалімен марапатталған еді, ал өткен жылы қазан айында Рамзан Кадыров кәмелетке толмаған осы екі ұлының Украинадағы ұрыс қимылдарына қатысып қайтқанын мәлімдеген болатын.
