Президент су тасқынына орай бірнеше әкімнің қызметтен кететінін ескертті
АСТАНА. 31 наурыз. Кеше Президент Қасым-Жомарт Тоқаев еліміздегі су тасқынына орай шұғыл кеңес өткізіп, онда бірнеше облыс әкімінің қызметтерін лайық емес екенін атап өтті. Бұл туралы Ақорда баспасөз қызметі дерегіне сүйенген rast.kz хабарлайды.
Кеңеске Премьер-министр Олжас Бектенов, Үкімет мүшелері, Президент әкімшілігінің басшылығы және басқа да лауазымды тұлғалар қатысты.
Жиында Мемлекет басшысына аймақтардағы қазіргі қалыптасқан ахуал туралы, атап айтқанда, адамдарды құтқару және су тасқынының салдарын жою үшін қабылданып жатқан шаралар жөнінде баяндалды.
Президент Үкімет пен әкімдердің жұмысын немқұрайлы және кәсіби міндетіне сәйкес келмейді деп сынға алды. Оның айтуынша, Үкімет пен жергілікті атқарушы органдардың арасында жүйелі байланыс болмаған. Қасым-Жомарт Тоқаев зардап шеккен өңірлер тұрғындарына үлкен көлемде шығын келуіне байланысты өкініш білдірді. Мемлекет басшысы қалыптасқан жағдайға байланысты кешірім сұрап, барлық азаматқа көмек көрсетілетінін айтты.
Жиын барысында Президент су тасқынына қарсы уақытылы шара қабылдамағаны үшін Премьер-министрдің бірінші орынбасары Роман Склярға, Су ресурстары және ирригация министрі Нұржан Нұржігітовке – қатаң сөгіс, Ақтөбе облысының әкісі Асхат Шахаровқа, Қостанай облысының әкімі Құмар Ақсақаловқа, Батыс Қазақстан облысының әкімі Нариман Төреғалиевке қызметтік міндеттеріне толық сай келмеуіне байланысты ескерту берді. Ал Атырау облысының әкімі Серік Шәпкеновке, Ақмола облысының әкімі Марат Ахметжановқа, Алматы облысының әкімі Марат Сұлтанғазиевке, Павлодар облысының әкімі Асайын Байхановқа, Абай облысының әкімі Нұрлан Ұранхаевқа қатаң сөгіс жарияланды.
Президент жағдайды қалыпқа келтіру үшін шұғыл шаралар қабылдаумен қатар жүйелі жұмыс жасау қажет екенін атап өтті.
Сонымен қатар Премьер-министрдің төрағалығымен республикалық штаб құру, сондай-ақ барлық өңірде су тасқынына қарсы жұмыстарды күшейту, ең бастысы, азаматтардың қауіпсіздігін қамтамасыз ету жөнінде тапсырма берілді.
Мемлекеттік құрылымдарға табиғат апаты салдарынан болған шығын көлемін анықтау және алдағы уақытта осындай апаттардың алдын алу үшін кешенді шаралар қабылдау міндеті жүктелді.
