USD
АСТАНА. 5 мамыр. Бүгін Парламент Мәжілісінің депутаттары бірінші президент Нұрсұлтан Назарбаевтың тұлғасын әспеттеу мақсатында берілген мәртебені алып тастау керек деп шешті. Бұл туралы «ҚазАқпарат» хабарлады.
«Мәжілістің жалпы отырысында палата депутаттары «Республикалық референдум туралы» ҚР Конституциялық заңына өзгерістер мен толықтыру енгізу туралы» ҚР Конституциялық заң жобасына Сенат енгізген толықтырумен келісті», – делінген агенттік хабарламасында.
Сонымен, сенаторлар енгізген толықтыруға сәйкес, «Референдум туралы» Заңнан Елбасы туралы норма алынып тасталатын болды.
«Бұл Конституциялық заң жобасын Қазақстан Республикасы Парламентінің депутаттары әзірледі. Өздеріңізге белгілі, заң жобасын биыл 4 мамыр күні Парламент Мәжілісі мақұлдап, Сенаттың қарауына жіберген болатын. Заң жобасын Парламент Сенатында қарау барысында қосымша толықтыру енгізілді. Бұл толықтыру комитет отырысында қаралды. Сенат, республикалық референдумның нысанасы бола алмайтын мәселелерді нақтылау мақсатында, «Республикалық референдум туралы» Конституциялық заңның 3-бабы 2)-тармақшасын жаңа редакцияда ұсынып отыр. Атап айтатын болсақ, «мемлекеттің тәуелсіздігін, республиканың бiртұтастығы мен аумақтық тұтастығын, оны басқару нысанын, республика қызметінің түбегейлі қағидаттарын өзгерту» мәселелерi референдум талқысына қойылатын мәселелер бола алмайды», – деді Мәжілістің заңнама және сот-құқықтық реформа комитетінің төрағасы Арман Қожахметов.
Оның айтуынша, осы тармақшаның қолданыстағы редакциядағы «Тәуелсіз Қазақстанның негізін салушы, Қазақстан Республикасының Тұңғыш Президенті – Елбасы іргесін қалаған Республика қызметінің түбегейлі принциптерін және Қазақстан Республикасының Тұңғыш Президенті – Елбасының мәртебесін өзгерту» деген сөздерді Парламент Сенаты алып тастауды ұсынды.
«Қорыта келгенде, «Республикалық референдум туралы» Қазақстан Республикасының Конституциялық заңына өзгерістер мен толықтыру енгізу туралы» Конституциялық заң жобасына Парламент Сенаты енгізген толықтырумен келісуді ұсынамыз», – деді комитет төрағасы.
Атап айтқанда, палата отырысына қатысқан 96 депутаттың барлығы аталған өзгерістерге қолдау білдірді.
Енді бұл құжат Мемлекет басшысына қол қоюға жіберіледі.
Бұдан бұрынт хабарланғандай, бүгін Сенаттың жалпы отырысында «Республикалық референдум туралы» Қазақстан Республикасының Конституциялық заңына өзгерістер мен толықтыру енгізу туралы» Конституциялық заң жобасы қаралды. Құжатқа түзетулер енгізілгендіктен, заң жобасы Мәжіліске қайтарылды.
Құжаттың бұрынғы нұсқасы бойынша Тұңғыш Президенттің мәртебесіне қатысты мәселелер республикалық референдумның нысанасы бола алмайды. Сенат депутаттары бұл норманы заң жобасынан алып тастауды ұсынды. Түзету қолданыстағы Заңның 3-бабының 2-тармағы туралы болып отыр.
