USD
ТАШКЕНТ. 16 қазан. IBA президенті Умар Кремлев өзбекстандық екі дүркін Олимпиада чемпионы Хасанбой Дусматовтың шайқасындағы нокаут үшін «Гелендваген» көлігін сыйақыға беретінін айтты. Бұл туралы penalty.kz ақпарына сілтеме жасаған rast.kz хабарлайды.
Умар Кремлев Өзбекстан байтағында өтіп жатқан IBA Nomad 16 турнирінің мәтбұғат мәслихатында Хасанбой Дусматовтың (7-0, 5 КО) алдағы жоспарларын жайып салды. Оның айтуынша, аталмыш былғары қолғап шебері биылғы желтоқсанда кәсіпқой бокста кезекті кездесуін өткізеді. Ал келесі жылдың алғашқы айларында оның қатысуымен Ташкентте титулдық жекпе-жек ұйымдастырылуы ықтимал.
«Қазір дайындық жүріп жатыр. Хасанбой желтоқсанда жекпе-жек өткізеді. Одан кейін келесі жылдың басында Ташкентте оның чемпиондық атағын қорғау шайқасын ұйымдастырмақпыз. Сондай-ақ сол кездесудегі нокаут үшін «Гелендваген» автокөлігін жүлдеге тігуді де қарастырып жатырмыз», – деді Умар Назарович.
IBA президентінің мәлімдемесіне қарағанда, Дусматовтың алдағы титулдық кездесуі ерекше сыйақымен есте қалуы ықтимал. Атап айтқанда, жекпе-жекте нокаут тіркелген жағдайда Mercedes-Benz G-Class, яғни көпшілікке «Гелендваген» атауымен танымал автокөлік жүлдеге қойылуы мүмкін.
Дегенмен бұл бастама әзірге жоспар ретінде айтылды. Ұйымдастырушылар сыйлықтың нақты шарттарын жариялаған жоқ.
Айта кетейік, бұған дейін Астанада өткен IBA Nomad турнирінен кейін Умар Кремлев Өзбекстан боксының танымал өкілдері Хасанбой Дусматов пен Баходир Джалоловқа кәсіпқой рингте жекпе-жектер ұйымдастыруға уәде берген еді.
Өзбекстандық боксшы кәсіпқой рингтегі соңғы кездесуін 2025 жылдың 20 шілдесінде Қырғызстан астанасы – Бішкекте өткізген. Сол жолы Дусматов филиппиндік нокаутшы Марк Антониомен кездесіп, төрешілердің бірауыздан шығарған шешімімен жеңіске жетті.
Хасанбой Дусматов қазірге дейін кәсіпқой бокста 7 шайқас өткізіп, бәрінде де жеңіске жетті, соның бесеуін нокаутпен аяқтады.
