USD
АФИНА. 22 наурыз. Футболдан Ұлттар лигасы С тобының жартылай финалында Грекия – Қазақстан матчында сөрелік құрамда кімдердің ойнайтыны анықталды. Бұл туралы Kazinform.kz ақпарына сүйенген rast.kz хабарлайды.
Қазақстан құрамасының бас жаттықтырушысы Магомед Адиев старттық құрамда алаңға Шацкий, Вороговский, Ерланов, Марочкин, Быстров, Қайыров, Астанов, Зайнутдинов, Бейсебеков, Чесноков, Самородов сынды ойыншыларды шығаруға ұйғарым жасап отыр.
Грекия құрамасы сапында Влаходимос, Болдок, Мавропанос, Цимикас, Бакасетас, Курбелис, Мадалос, Хацидиакос, Масурас, Яннидис, Пелкас ойнайды.
Бұған дейін екі құрама үш рет кездескен. Оның үшеуінде де гректер жеңіске жеткен.
Матч Афина қаласының «Айя-София» стадионында Астана уақытымен сағат 00:45-те басталады.
Ойынға нидерландтық арбитр Дэнни Маккели алаңда төрешілік етеді.
Кездесуде Қазақстан ұлттық құрамасы Грекияны жеңер болса, Грузия (Сакартвело) – Люксембург жұбының жеңімпазымен 26 наурыз күні Ұлттар лигасының финалында күш сынасып, 2024 жылғы Еуропа чемпионатының жолдамасын сарапқа салады.
Футболдан Еуропа чемпионаты 14 маусым – 14 шілде аралығында Германияда өтеді.
Бүгін мұның алдында Сакартвело – Люксембург құрамалары арасындағы ойын ойналып бітті. Ол 2:0 есебімен карвельдердің пайдасына шешілді. Екі голды да картвел Буду Зивзивадзе ұрып түсірді. Ол матчтың 40 және 63-минуттарында меймандар қақпасынан дәл көздеді.
Грекия – Қазақстан құрамаларының кездесуі 00:35 сағаттан бастап Qazaqstan және Qazsport телеарналарынан тікелей эфирде көрсетіледі.
