USD
СИЭТЛ. 7 шілде. Бүгін таң алдында АҚШ-тың Сиэтл қаласындағы «Lumen Field» стадионында Бельгия құрамасы 1/8 финалдық матчта алаң иелері – АҚШ құрамасын 4:1 есебімен тас-талқан етіп жеңді. Бұл туралы «Спорт-Экспресс» ақпарына сілтеме жасаған rast.kz хабарлайды.
Екі команда арасындағы кездесу басталмай тұрып, оған қатысты орасан зор жанжал туып кетті. Бұған ФИФА-ның мұның алдында Босния және Герцеговина арасындағы ойында алаңнан қуылып кетіп, 3 матчқа дисквалификация алған америкалық Фалорид Балогунның жазасын жедел шартты түрге алмастырып, осы матчқа қатысуға рұқсат беріп жібергені себеп болды. Шын мәнінде бұл негізсіз шешім еді, алайда ФИФА басшылары Тәртіптік кодекстің 27-бабын пайдалана отырып, оған осындай құқық беріп қойды. Дегенмен, бұл әлдеқандай бір тосын шешім болған жоқ, себебі халықаралық федерация бұған дейін 2026 жылғы әлем чемпионатының іріктеу турнирінде екі матч жіберіп алуға тиіс болған Криштиану Роналдуды тап осындай тәсілмен «арашалап» алып шыққан. Былайша айтқанда, бәрі заңды.
Ал бұл оқиғаның жанжалды болып шығуы ФИФА мұндай қадамға футболға ешқандай қатысы жоқ АҚШ президенті Дональд Трамптың халықаралық ұйым басшысы Джанни Инфантиноға екі рет қоңырау шалып, Балогунның дисквалификациясы жағдайын қайта қаруды өтінгенінен туып тұр. Басында мұны біреулердің шығарып жүргені деген әңгіме тарады. Алайда соңынан мұның жайын Трамптың өзі жұртқа жайып жіберді.
«Бұл – әділетсіздік, бұлай етуге болмайды. Сондықтан мен ФИФА-дан аталмыш шешімді қайта қарауды сұрадым. Өзім қатты құрмет тұтатын адаммен сөйлестім. Енді оны он есе артық сыйлаймын. Ол бұрын да жақсы еді, енді тіпті АҚШ футболын қосымша ілгері жылжытуға көмектесіп жатыр», – деп жазды ол әлеуметтік желіде.
Мұның бәрі әлемдегі АҚШ құрамасына бүйрегі бұратындарға қатты соққы болып тиді.
Екінші жағынан Бельгия құрамасын да ерекше қайрап тастады. Сондықтан оның ойыншылары алаңға тас-түйін болған берік шешіммен өте ширақ болып шықты. Олар Трамп пен Инфантиноның өздеріне қарсы жасап отырған әділетсіз әрекеттеріне лайықты жауап қайтаруға жұмылды.
Кездесу Бельгия құрамасының жойқын шабуылымен басталды. Ақыры қонақтар 9-минутта есеп ашты. Оны Николас Раскиннің қақпа алаңына көлбей берген допты Шарль де Кетеларе басымен ұрып түсіру арқылы өз есебіне жазды. Америкалықтар 31-минутта Малик Тилльманның дәл соққысымен есепті теңестірді. Бірақ араға екі минут салып, бельгиялықтар тағы алға шықты. Оны тағы да Шарль де Кетеларе салып, дубльге қол жеткізді.
Екінші таймның басында бельгиялықтар есепті ұлғайта түсті. Бұған америкалықтар қақпашысы Матью Фриздің айып алаңының сыртына жүгіріп шығып тоқтатқан добын өз ойыншыларына беру кезіндегі қателігі себеп болды. Оны іліп алған Ханс Ванакен 57-минутта алыстан ұрып, тордан бір-ақ шығарды. Ал матчтың соңғы нүктесін 67-минутта алаңға шыққан Ромелу Лукаку 90+3-минутта қойды. Сөйтіп, америкалық арманның күлі көкке ұшты.
Енді «қызыл перілер» ширек финалда Испания құрамасымен беттеседі. Матч 11 шілде, жұма күні Астана уақытымен сағат 00:00-де басталады. Ол Лос-Анджелес қаласындағы «Инглвуд» стадионында ойналады.
