USD
АЛМАТЫ. 14 тамыз. Қазақтың белгілі қаламгерлерінің бірі, ақын, жазушы, журналист, композитор, айтыскер Бекжан Әшірбаев кенеттен өмірден өтті. Бұл туралы өз мәнбесіне сүйенген rast.kz хабарлайды.
Ол – Қазақстанның еңбек сіңірген қайраткері, Халықаралық «Алаш» әдеби және мемлекеттік «Дарын» жастар сыйлықтарының лауреаты. Қазақстан Жазушылар және Журналистер одақтарының мүшесі.
Қабырғалы қаламгердің қайтыс болғаны жайлы қаралы хабарды Facebook әлеуметтік желісінде Қазақстан Жазушылар одағының хатшысы, ақын, публицист Қасымхан Бегманов жеткізді.
«Дарынды ақын, талантты сазгер, Қазақстанның еңбек сіңірген қайраткері, Халықаралық «Алаш» әдеби және мемлекеттік «Дарын» жастар сыйлықтарының лауреаты Бекжан Әшірбаевтың мезгілсіз дүниеден өтуіне байланысты туған-туыстары мен жақындарына, әріптестері мен барша қаламдас қауымға қайғыра көңіл айтамыз», – деп жазды ол.
Әшiрбаев Бекжан Төребекұлы 1974 жылы Оңтүстiк Қазақстан (қазіргі – Түркістан) облысы, Мақтаарал ауданы, «Ленин жолы» ұжымшарында туған.
1996 жылы Әл-Фараби атындағы Қазақ ұлттық университетiнiң журналистика факультетiн үздiк бiтiрген. Сол жылдан бастап осы бiлiм ордасында аға оқытушы қызметiн атқарған. Журналистика саласында да елеулі еңбек еткен. Әл-Фараби атындағы ҚазҰУ-дың республикаға тарайтын «Қазақ университетi» газетiнiң бас редакторы (2002-2006), республикалық «Azamat.kz» қоғамдық-саяси апталығы бас редакторының бiрiншi орынбасары (2005-2006), республикалық «Ел мен Жер» қоғамдық-саяси апталығының бас редакторы (2006), республикалық «Жас қазақ үнi» газетi бас редакторының орынбасары (2007), республикалық «Қазақ әдебиетi» газетi бас редакторының бiрiншi орынбасары (2007 жылдан) болып қызмет атқарған.
«Оның ақындық әлемі де ерекше болатын. «Қоңыр әуен» атты жыр жинағы оқырманға жол тартса, айтыс өнеріндегі өрнекті сөздері, сазгерлік қыры мен ел арасына кең тараған әндері шығармашылық болмысының сан қырлы екенін танытты. Өмірінің соңына дейін әдебиет пен журналистикаға қызмет етіп, артында өшпес із қалдырды», – деп атап көрсетті Қасымхан Бегманов.
Бекжан 1989 жылдан бері республикалық ақындар айтысына қатысып келді. Қазақ еліне әуесқой композитор ретінде белгілі әнші Тоқтар Серіктің орындауындағы «Көршінің қызы» атты әнімен кеңінен танылды.
Қош бол, арынды ақын, қарымды қаламгер, сырнайлы сазгер!
