USD
Бозбала кезімізде Алматыда табыстық. Біз оқу іздеп, оттай жанған Оңтүстіктен келдік. Ол қыр арқасын соқа жыртқан, орысы мен орманы көп Солтүстік жақтан келді. Содан ба, санасы сергек, ойы орамды еді. Ұлт ұпайын түгелдейді де жүреді. Біз КазГУ-дің журфагына, ол КазПИ-дің тарфагына түсті. Бірақ журналистерге есесін жіберген жоқ. Еркін жазды, есіліп жазды, көсіліп жазды. «Бес ғасыр жырлайды» мен «Батырлар жырын» жата-жастана оқыған оның тілі керемет құнарлы еді. Сол тілді салды көркем көсемсөздің көкпарына… Қаламы қарымды спорт журналисі Қыдырбек Рысбек көп ұзамай-ақ жазу өнерінің шеберіне айналды.
Жастықтың жалауындай болған «Жас алашта» бірге қызмет істедік. Ол бұл басылымға бізден бір жыл бұрын келді. Дәлірек айтқанда, газеттің спорт бөлімінің меңгерушісі Несіп Жүнісбаев КазПИ-ге бір жиынға барғанда осы бір қағілез жігітке көзі түсіп, біраз уақыт бақылаған соң, оны «Лениншіл жастың редакциясынан бір-ақ шығарды. Сайыпқыран сөз сардары Сейдахмет Бердіқұловтың ұлағатты ұстаханасының қызуы қайнап тұрған көрігіне әкеп, салды да жіберді. Қыдырбек уақытпен санаспады, нағыз жазу жорығының сарбазы болды да шықты. «Күндіз отырмадым, түнде ұйықтамадым», – деген түркілердің тұжырымы оның сол тұстағы болмыс-бітіміне, тек-табиғатына көбірек келетін еді.
Арқадан Алатауға дейін алқынбай шауып жеткен Құлагер сынды еді ол… Біздің тұсымызда баспасөздегілердің де, басқа сөздегілердің де алымдылығы мен шалымдылығы жағынан оған жететіні жоқ-ты. Ол сөзін кестелей, сөйлемін дестелей білді. Ұлттық өрнек салды. Біз оның әр сөзінің астары мен қатпарын жатып алып зерттейтін едік. Қатарластарымыз арасында алғашқы кітапты да Қыдыр шығарды.
Өрімдей жас кезінде дүние жүзіндегі құрлықтар құлақ түрген оқиғаларға арнаулы тілші аттандыра алатын «Ер-Дəулет» ақпарат агенттігін құрды. Төрт-бес жыл дəуірі жүрген «Ер-Дəулет» жекеменшік агенттігі ресми агенттіктерден кем түскен жоқ. Кейіпкеріміз соңғы отыз жылда алты Олимпиаданың куəгері болды. Кəрі құрлықтардың шаңын қаққан талай дүбірлі додалардан шұғыл репортаж жолдады. Кейін спорт журналисінің қаламына қоса спорт шенеунігінің портфелін ұстады. Ірілі-ұсақты спорт мекемелерін басқарды. Ел аралап, шымыр денелі қазақ балаларын іздеп, шарқ ұрды. Өз ісіне əбден берілді. Егілді. Жегілді. Сөгілді. Төгілді. Барған жерінің бəрінде жайқалып өскен құрақтай жасөспірімдер бой көрсетті. Соның бəрі шығармашылығына ептеп қолбайлау болғаны да рас.
Жоқ, қолын байлағанымен, жолын байлай қоймапты. Бұрын спорт əлеміне ат қосқан ұлт ұланына қатысты жылт еткен жаңалықты елге жедел жеткізіп, тұғырлы тарландарды теңдессіз теңеулер арқылы кейіптесе, енді қазақ спортының шежіресін жасаумен айналысты. Балуандарды да, боксшыларды да түгелдеп шықты.
Жақында төрт аяғын тең басқан тағы бір туындысын ұсынды. «Қазақтың 72 бапкері» деген ауқымды жинақ – шүмектеп емес, шелектеп төгілген тердің жемісі. Осыдан кейін талай спортшыны томағасын алып, топқа салған оны қай бапкерден кем дей аламыз?!
Айналаң аман, төңірегің түгел болсын, қазақтың 73-ші бапкері! Қазынаң молая берсін, Арқа төсінде жортқан Құлагер!
Бауыржан ОМАРҰЛЫ,
2021 жыл
«Шағала» жинағынан
