USD
БУДАПЕШТ. 2 маусым. Чемпиондар лигасының жеңімпазы, Сакартвело (Грузия) құрамасының лидері Хвича Кварацхелия финалдық ойыннан кейін орысша сөйлеуге ынта танытпады. Бұл туралы Dialog.ua ақпарына сүйенген rast.kz хабарлайды.
Картвель (грузин) футболшысы венгер (хунгар) байтағындағы «Пушкаш Арена» стадионында Париждің «Пари Сен-Жермені» мен Лондонның «Арсеналы» арасында 30 мамыр күні ойналған УЕФА Чемпиондар лигасының финалдық матчында бұлардың алдыңғылары сапында алаңға шықты.
Тбилисидің 25 жасар тумасы кездесудегі ең белсенді қимылдаған футболшылардың бірі болды. Ойынның екінші таймында париждіктерге таразы басын теңестіруге мүмкіндік беретін пенальтидің белгіленуіне де сол себепкерлік етті. Матч 1:1 есебімен тең аяқталды. Содан кейінгі овер-таймда да есеп өзгерген жоқ. Ал кезек пенальтиге келгенде, ПСЖ 4:3 есебімен басым түсті. Лондондықтардан соңғы орындаушы допты қақпа маңдайшасы мен бағаны қиылысына тигізіп, мүлт кетті, демек, дарбазашы ресейлік Матвей Сафоновтың қақпада тұрғаны болмаса, тікелей қол тигізуі болмады.
Картвель футболшысы Хвича Кварацхелия бұл күні жақсы ойыны үшін ғана емес, сонымен қатар финалдық матчтан кейінгі бір әрекетінің аарқасында да күллі әлемнің көзіне ілікті.
Айта кетейік, Кварацхелия шетелдік мансабын 2019 жылы Ресейдің «Локомотив» (Мәскеу) клубында бастады, бірақ сол жылы жазда «Рубин» (Қазан) жасағына ауысып, 2024 жылға дейін келісім-шартқа отырды. Алайда 2022 жылғы ақпанда Ресейдің басқыншылар армиясы Украина жеріне жаппай шабуыл жасағаннан кейін өз еркімен командадан кетіп, отанына оралды. Сол уақытта Батумның «Динамосында» ойнады. Ал 2025-2026 жылғы маусымда, яғни осы мәреге жеткен чемпионатта «Пари Сен-Жермен» сапында өнер көрсетті. Турнирдің қорытындысында ол Чемпиондар лигасының ең үздік ойыншысы болып танылды. Шабуылшы 16 ойында 10 гол салып, 6 нәтижелі пас берді.
Енді финалдық кездесуден кейінгі инцидентке келейік. Оның барысында Кварацхелия Ресей журналисінің осы оқиғаны орысша қайталап айтып беруін сұрағанда, түрі кілт өзгеріп, оған ағылшын тілінде: «No, I can’t speak, sorry», яғни «Жоқ, мен сөйлей алмаймын, кешіріңіз», – деп жауап қайтарды. Бұдан әрі картвель (грузин) тілінде сөйлеуді жалғастыра берді. Хвича кейін де неге бұлай жасағанына түсіндірме беріп, әуре болып жатпады. Бұл, әрине, ресейліктер мен орыс тілділер отырған чаттарда кезекті бір ашу мен ызаға толы үлкен талқылаудың аренасына айналып кетті. Сонымен қатар, картвель спортшысының бұл бас тартуына қатты мән беріп, қызу қолдап жатқан желі пайдаланушылар аз болмады. Мұнда, әсіресе, посткеңестік, яғни бұрын Кеңес Одағының құрамында болған елдердің тұрғындары айрықша белсенділік танытып жатыр.
