USD
ГРОЗНЫЙ. 19 шілде. Ресейдің Шешенстан автономиясындағы өкілі Рамзан Қадыров НАТО-ның Украинаға көмек көрсетіп келе жатқан елдеріне соққы беруді ұсынды. Бұл туралы The Moscow Times ақпарына сілтеме жасаған rast.kz хабарлайды.
«Дон-дон» Ресей Солтүстік альянстың Украинға қару-жарақ пен барлау мәліметтерін беретін және басқалай да көмек көрсететін елдеріне қарсы әскери операция бастауы тиіс деді.
«Егер олар Ресейдің болып жатқан оқиғаларға орай қолдарын қуыстырып, төзіп отыра бермейтінін ешбір ұқпайтын болса, демек, осылардың бәрін дереу қолға алып… натолықтардың жексұрын тамағына тыққылайтын уақыт келген. Тротилдің иісін сезініп, Калашниковтің күркірі мен Т-90-ның шиқылын естіген бойда олар бәрін түсініп, ақиқатқа оралатын болады. Отты ашатын уақыт келді, бастау керек!», – деп жазды Кадыров телеграм-арнада.
Оның айтуынша, қазір Ресей «жұмсақтық танытып, ақырын қимылдап жатыр», сондықтан бұл тәсілді өзгерту керек, өйткені НАТО елдері «тек күштің тілін» ғана түсінеді.
«Біз соғыс машинамыздың тежегіштерін босатып жібергеннен кейін, біздің диірмендеріміз олардың сүйектерін ұнтақтай бастағаннан кейін, барлық Батыс елдерінің көшбасшылары құлдық ұрып, кешірім сұрау үшін кезекке тұрады», – деп атап өтті Қадыров.
Ол шешен арнайы күштерінің жасақтары Владимир Путин көрсеткен кез-келген бағытта алға жылжуға дайын екенін және жер «Ресей жауларының астында жанып тұруы» үшін «күрделілігі жоғары бұйрықтарды сол қалпында орындағысы келетінін» айтты.
НАТО елдері Анкарадағы шілде саммитінде Украинаға 2026 жылы 70 миллиард еуро көлемінде әскери көмек беретін болып шешті. Алдағы 2027 жылы осы сомадан кем емес мөлшерде тағы қаржы бөлуге уәде етілді. Альянстың бірлескен қорытынды декларациясында Украинаның тұтас трансатлантикалық қауіпсіздікке үлес қосқаны атап өтілді, ал одақтастар өздерінің бұл елдің бостандығын, егемендігін және территориялық тұтастығын сақтауда «мызғымас қорған» болатындарын растайды.
