USD
НЬЮ-ЙОРК. 20 шілде. Бүгін тура түн жарымында Нью-Йорктегі «New York/New Jersey Stadium» стадионында өткен финалдық матчта Испания Аргентинаны овертаймда 1:0 етіп ұтып, өзінің тарихында екінші дүркін әлем чемпионы атағына қол жеткізді. Бұл туралы «СпортЭкспресс» ақпарына сілтеме жасаған rast.kz хабарлайды.
Финалдық кездесу Астана уақытымен сағат 00:00-де басталды.
Негізгі уақыттың өне бойында Испания құрамасы басым ойнағанымен, матчта есеп ашылмай, 0:0 есебімен аяқталды.
Мұның есесіне, испандар қосымша уақыттың екінші таймында жалғыз гол соғып, өздері діттеп келген мақсаттың биігіне көтерілді.
Чемпиондық тағдырын шешкен «алтын голды» 106-минутта Нико Уильямс берген допты тиімді пайдалана білген Ферран Торрес соқты. Оның қақырата ұрған добына бұл жолы қақпашы тосқауыл қоя алмай қалды. Осы жеңісті жеткізген екі футболшы да соның алдында ғана алаңға шыққан еді.
Сөйтіп, Ферран Торрес Аргентина мен Месси мифінің күлін көкке ұшырды.
Алаңда олардың өздері емес, көлеңкелері жүргендей әсер қалдырды. Тіпті олардың финалға қалай шыққандарына таң қалғандар да аз болған жоқ.
Бұған қоса, Аргентина қосымша уақыттың бәрін азшылықта өткізді – матчтың 90+3-минутында екінші мәрте сары қағаз алған Энцо Фернандес алаңнан қуылды. Бірақ ол тіпті бұған дейін ескерту алмаса да, осы жолы «ашық аяқпен» ниетті түрде қарсыласына шабуыл жасағаннан кейін алаңнан қуылып кетуіне болатын еді. Жалпы, аргентиналықтардың біразы ойынды өте дөрекі өткізді. Сондықтан сары қағазды да түгел солар алып шықты. Олардың арасында арандату пиғылында жүрген футболшылар көп болды.
Матч барысында испандардың есеп ашатын және оны ұлғайта алатын мезеттері өте көп кезікті. Алайда соның бәрінде – қақпа алаңына қарай пас беруде де, келген допты сәтті игеріп, тиімді пайдаланып қалуда да қателіктер жиі ұшырасты.
Дегенмен ақырында әділдік салтанат құрды. Турнирдегі басты фаворит саналған Луис де ла Фуэнтенің командасы сол үмітті ақтады.
Осымен, Испания екінші сапар әлем чемпионы атанды. Ол бірінші рет бұл атаққа 2010 жылы қол жеткізіп еді.
Жалпы, осы кезге дейін Бразилия (5 рет), Германия (4), Италия (4) және Аргентина (3), Уругвай (2) және Испания құрамалары чемпион атанған болатын.
Чемпионат қорытындысында Испанияның жартылай қорғаушысы Родри турнирдің ең үздік ойыншысы атанды. Ал француз Килиан Мбаппе 10 добымен ең мерген шабуылшы атағына қол жеткізді.
Суретте: Ферран Торрес.
