USD
АНКАРА. 12 желтоқсан. Түркияның «Анкарагюджю» клубының президенті команданың «Ризеспормен» ойынынан кейін арбитрды соққы жығып, өзі түрмеге түсті. Бұл туралы Би-би-си ақпарына сүйенген rast.kz хабарлайды.
Инцидент дүйсенбі күні кешке жергілікті «Анкарагюджю» мен «Ризеспор» арасындағы суперлига чемпионатының кездесуі кезінде орын алды. Матч 1:1 есебімен тең аяқталды. Ойынның 14-минутында Олимпиу Марицанның есеп ашуымен алда тұрған алаң иелері 97-минутта өз дарбазаларына гол жіберіп алды. Арбитр бірінші таймда анкаралық Әли Соудың соққан добын есепке алмаса, 51-минутта оның өзін екінші «сары қағаз» алуына байланысты алаңнан қуды.
Матч аяқталған бойда «Анкарагюджюдің» қожайыны әрі президенті Фарук Кожа алаңға жүгіріп шығып, бас төреші Халил Умут Мелерді бетінен ұрды. Ал арбитр құлап түскенде, президентпен бірге бірнеше ойыншы оны жабылып тепкілеуге кірісті. Мұның ақырында рефери сүйектері сынып, кеселханаға түсті.
Жанжалды оқиға сол мезетте тікелей эфирден көрсетіліп тұрды.
Осыдан кейін Фарук Кожа мен қазыны сабауға қатысы бар тағы екі адам дереу қамауға алынды. Сондай-ақ Түркия чемпионатындағы барлық матчтар белгісіз мерзімге дейін тоқтатылды. «Барлық лигадағы ойындар белгісіз уақытқа дейін кейінге қалдырылды. Төрешіге шабуыл жасау – бүкіл түрік футболы үшін масқара, ұят жағдай», – деді Түркия футбол федерациясының президенті Мехмет Бюкекши.
Кожаның өзі оқыс оқиғаның «төрешінің дұрыс қазылық етпеуінен және оның қасақан жасаған арандатушылық әрекеттерінен» туып кеткенін мәлімдеді.
37 жастағы Халил Умут Мелер – түрік арбитрлары ішіндегі ең беделділерінің бірі. Ол сондай-ақ UEFA-ның мейлінше рейтингісі жоғары төрешілерінің тізіміне кіреді, ұйым аясындағы халықаралық матчтарға қазылық жасауға жиі шақырылып тұрады.
Оспадарсыз оқиғаға Түркия президенті Реджеп Тайип Ердоғанды да үнсіз қалдыра алмады. Ол болған жайтқа еріксіз жаға ұстағанын айтып, төрешіге тезірек сауығып кетуді тіледі.
«Спорт бейбітшілік пен бауырмалдықты үндейді. Спорттың зұлымдыққа қатысы жоқ. Біз түрік спортына зорлық-зомбылықтың еніп кетуіне ешқашан жол бермейміз», – деді Ердоған.
Түркия жастар және спорт министрі Осман Ашкин Бак төрешіге шабуылды батыл айыптады. Әділет министрі Йылмаз Тунч факт бойынша тергеу амалдарының қолға алынғанын баяндады. Ішкі істер министрі Әли Ерикая тергеу барысын ұдайы назарда ұстап отыратынын жеткізді.
Түркия футбол федерациясының президенті Мехмет Бюкекши «Анкарагюджю» клубының қатаң жазаға тартылатынын айтып отыр. Ол «адамшылықтан жұрдай оңбаған оқиғаның» осы клубтан шығуы негізсіз емес екеніне де назар аударды.
