USD
МӘСКЕУ. 7 мамыр. Сарапшылар Ресей тұрғындарының елде алкоголь бағасы қымбаттағаннан кейін арақты көбірек құныға іше бастағандарына назар аударды. Бұл туралы The Moscow Times ақпарына сүйенген rast.kz хабарлайды.
«Коммерсантъ» газетінің жазуынша, спиртті ішімдіктер бағасы қауырт қымбаттауына байланысты ресейліктер арзан алкогольдік ішімдіктерге, ең алдымен араққа ауыса бастаған. Айталық, биылғы қаңтар-сәуір айларында орыстар 38,33 миллион дал ішімдік сатып алған. Бұл жылдық көрсеткіштен 3,6%-ға артық. Ол сыра, сидр, пуаре және медовуханы есепке алмағанда, 64 миллион далға жеткен алкоголь сатылымының жартысынан астамын құрайды.
Stellar Group директоры Александр Гревцов ресейліктер 2026 жылдың басынан бастап ең төменгі бөлшек сауда бағалары (МРЦ) көтерілгеннен кейін алкогольдің күрт қымбаттауына байланысты жұрттың арақты жиі таңдай бастағанын атап өтті. Осылайша, 0,5 литрлік бренди бөтелкесіндегі МРЦ бірден 28%-ға, яғни 605 рубльге дейін, ал коньяк пен виски-16%-ға, яғни 755 рубльге дейін көтерілген.
«Алкопро» гильдиясының президенті Андрей Московскийдің айтуынша, араққа арналған МРЦ 17%-ға, жарты литр үшін 409 рубльге дейін өскенімен, ол әлі де басқа күшті сусындарға қарағанда арзан, сондықтан тұтынушылар соған ауысады. Ұлттық алкоголь саясатын әзірлеу орталығының басшысы Павел Шапкин ресейліктер үнемдеу режиміне ауысқандықтан арақтың пайдасына таңдау жасап жатқанын қосады.
«Сәуір айының ортасында жарты литрлік бөтелке арақты 450-500 рубльге сатып алуға болатын еді, ал ресейлік вискидің соған ұқсас көлемі 800-1000 рубльді құрады», дейді сарапшылар.
2022 жылы соғыс басталғаннан кейін Ресей президенті Владимир Путин елдегі алкогольді тұтынуды азайтуды талап етті. Үкімет тиісті тұжырымдаманы бекітті, оның шеңберінде 2030 жылы әр тұрғынға 7,8 литрден аспайтын этанол болуы керек-тін.
«Осыған қарамастан, 2024 жылы Ресейде күшті алкогольді сату сегіз жыл ішінде ең жоғары деңгейге жетті, – жан басына шаққанда 8,5 литр болды», деп есептеді FinExpertiza.
2025 жылы Ресейде алкоголизммен ауыру 2016 жылдан бері рекордты жаңартты: 100 мың тұрғынның 56,9-ы сондай кепті киді. Сөз бірінші рет қойылған тиісті диагноздар туралы болып отыр.
«Қазір Ресейде алкогольді тұтыну жан басына шаққанда 8,06 литр этанолды құрайды», деп хабарлады сәуір айында денсаулық сақтау министрлігінің басшысы Михаил Мурашко.
