USD
АСТАНА. 3 қыркүйек. Мемлекет басшысы Қасым-Жомарт Тоқаев бүгін, 3 қыркүйек күні Ақмарал Әлназарованы Денсаулық сақтау министрі етіп қайта тағайындау жөніндегі Жарлыққа қол қойды. Бұл туралы Ақорда баспасөз қызметінің дерегіне сүйенген rast.kz хабарлайды.
«Мемлекет басшысының Жарлығымен Ақмарал Шәріпбайқызы Әлназарова Қазақстан Республикасының Денсаулық сақтау министрі лауазымына тағайындалды», – делінген Ақорданың Telegram арнасында жарияланған ресми ақпаратта.
Ақмарал Шәріпбайқызы 1971 жылы 16 ақпанда Қызылорда қаласында туған.
Алматы мемлекеттік медицина институтын (1994), Қорқыт ата атындағы Қызылорда мемлекеттік университетін (2006) бітірген. Дәрігер-педиатр. Медицина ғылымдарының докторы. Денсаулық сақтау ісінің үздігі.
Қызмет жолдары:
1994 жылы еңбек жолын Қызылорда қалалық балалар ауруханасы қабылдау бөлімшесінің дәрігері болып бастаған.
1997–1999 жылдары – Педиатрия және балалар хирургиясы ғылыми орталығы Қызылорда филиалының кіші ғылыми қызметкері,
1999–2001 жылдары – Қызылорда облысы денсаулық сақтау басқармасының бөлім бастығы, бастығының орынбасары,
2001–2003 жылдары – Қызылорда облыстық балалар ауруханасының бас дәрігері,
2003–2004 жылдары – Қызылорда облысы денсаулық сақтау басқармасының басшысы,
2005–2007 жылдары – Денсаулық сақтау министрлігі медициналық қызметтер көрсету саласындағы бақылау комитеті облыстық басқармасының басшысы,
2007–2013 жылдары – Қызылорда медициналық колледжінің директоры,
2013–2014 жылдары – Қызылорда облысы әкімінің орынбасары,
2014–2015 жылдары – Қызылорда облыстық мәслихатының хатшысы,
2015–2019 жылдары – Қызылорда облысы денсаулық сақтау басқармасының басшысы,
2019–2020 жылдары – «Нұр Отан» партиясы Қызылорда облыстық филиалы төрағасының бірінші орынбасары,
2020–2024 жылдары – Қазақстан Республикасы Парламенті Сенатының депутаты,
2024 жылдың 6 ақпанынан бері Денсаулық сақтау министрі болып қызмет атқарып келеді.
«Парасат», «Құрмет» ордендерімен, «Шапағат», «Астанаға – 10 жыл» медальдарымен наградталған.
