USD
АЛМАТЫ. 22 маусым. Алматы – Бішкек тас жолы бойында орын алған сұмдық жол-көлік оқиғасы бес адамның өмірін жұлып әкетті. Бұл туралы Nur.kz ақпарына сүйенген rast.kz хабарлайды.
Алматы-Бішкек тас жолында үш көліктің қатысуымен ірі жол апаты болған.
Алматы облысының полиция департаментінің хабарлауынша, осының салдарынан бес адам қаза тауып, тағы төрт адам жарақат алған.
Instagram желісіндегі Sergek.kaz аккаунтында Алматы – Бішкек тас жолында болған оқиға орнынан түсірілген кадрлар жарияланды. Апат салдарынан жеңіл көлік пен жүк көлігі зақымданғаны, жүк көлігінің тіркемесі өртенгені атап өтілді.
Басылымға Алматы облысының полиция департаменті түсіндірме берді. Олар жол апатының Алматы-Бішкек тас жолында болғанын растады.
«Алдын ала мәлімет бойынша, «Mitsubishi Pajero» автомобилінің 42 жастағы айдаушысы қарсы қозғалыс жолағына шығып кетіп, «Toyota Highlander» көлігімен, содан кейін тіркемесі бар DAF жүк машинасымен соқтығысқан. Нәтижесінде апат орнында бес адам тіл тартпай қаза тапқан. Олар – «Mitsubishi Pajeroдің» төрт және «Toyota Highlanderдің» бір жолаушысы. Қалған жолаушылар әртүрлі дене жарақатымен медициналық мекемелерге жеткізілген», – делінген хабарламада.
Полиция департаментіндегілер болған оқиғаға қатысты қылмыстық іс қозғалғанын, қажетті барлық тергеу амалдары жасалып жатқанын хабарлады.
