Киевте Украинаға контингент орналастыру жөнінде кеңес болып өтті
КИЕВ.4 сәуір. Киевте Украинада қауіпсіздіктің кепілін жасау үшін Еуропа елдері әскери контингентін орналастыру жөнінде кездесу ұйымдастырылды. Бұл туралы Dialog.ua ақпарына сүйенген rast.kz хабарлайды.
Енді жақын айларда бұл бастаманы егжей-тегжейлі пысықтап алу үшін серіктестермен және әскерилермен тұрақты кездесу өтіп тұратын болады.
Киевте 4 сәуір, жұма күні өткен кездесуге Украина, Ұлыбритания және Франция өкілдері қатысты. Онда батыстық әріптестердің қауіпсіздік кепілдігі аясында Украина аумағында шетелдік әскери контингентті орналастыру мүмкіндігіне қатысты мәселе талқыланды. Онда осы бағыттағы екі айлық жұмыстың нәтижесі белгілі болды.
Кездесуден кейінгі брифингте Украина президенті Володимир Зеленський мұның бұл мақсаттағы бірінші кездесу екенін, ал алдағы айда бастаманы егжей-тегжейлі пысықтау үшін серіктестермен және әскерилермен тұрақты кездесулер өтуі жоспарланғанын, содан кейін миссия туралы толық түсінік болатынын айтып берді.
Мемлекет басшысы бұл процеске тек Лондон мен Париж ғана емес, басқа да көптеген елдердің кіретінін жеткізді, бірақ президент олардың қай елдер екенін айтып жатпады. Ол осы орайда бұл елдердің коалициясы болатынын атап өтті. Әңгіме жерде, әуеде және теңізде қорғанысты күшейту, сондай-ақ әуе қорғанысы контингентінің болуы турасында болып отыр.
Бұған қоса, мемлекет басшысы атыстың сөзсіз тоқтатылуы керек екенін, тек содан кейін ғана келіссөз турасындағы әңгіменің кез келген форматта жалғаса алатынын айтты.
«Бірақ бұл үшін орыстар қазіргідей жай кісі өлтіруші емес, дипломатияға дайын адекватты адамдар болып үлгеруі қажет. Ал қазір шайтан бейнесінде шауып жүр», – дегенді айтты сосын ел лидері.
Зеленський сондай-ақ АҚШ президенті Дональд Трамптың Украинаға енгізген тарифтері мәселесіне де тоқталды. Президент бұл шаралардың Украина экономикасына әсер етпейтінін, өйткені Америкамен арадағы тауар айналымы бар болғаны 3,5 миллиард долларды ғана құрайтынын атап өтті.
