Медведев келісім жасасқаннан кейін Украинаны толық басып алуға шақырды
МӘСКЕУ. 10 шілде. РФ қауіпсіздік кеңесі төрағасының орынбасары Дмитрий Медведев Киевпен бейбітшілік жөнінде келісімге қол қойғаннан кейін Украинаны түгел басып алуға ұсыныс жасады. Бұл туралы The Moscow News ақпарына сүйенген rast.kz хабарлайды.
«Ресей Мәскеу мен Киев бейбіт келісімге қол қойып, соғысты тоқтатқаннан кейін Украинаның бүкіл территориясын басып алуға қатты дайындалуы қажет», – деді Дмитрий Медведев.
«Тіпті қағазға қол қойып, жеңілгенін мойындағандарынан кейін де [Украинадағы] радикалдардың қалып қойған бір бөлігі күштерін қайта топтастырып алғандарынан кейін ерте ме, кеш пе, Ресейдің батыстағы жауларынан қанаттанып алып, билік басына қайта оралады. Сол кезде сұмырайларды ақи-тақи табан астында таптап құртатын уақыт келеді», – деп жазды Медведев телеграм-арнада.
Оның айтуынша, сол мезетте Ресей «бандералық квазимемлекет табытының қақпағына ұзын болат шегені» мықтап қағып тастауы, сондай-ақ «оның қанды мұрасының қалдықтарын жойып жіберіп, қалған жерлерін орыс жерлерінің құшағына қайтаруы» тиіс.
«Бірақ Ресейдің жаулары бұдан кейін де ешқайда құрып кетпейді. Олар күштерін жинастырып, біздің елімізді жойып жіберудің қолайлы сәттерін күтіп отырады. Біз Отанымызды қорғау жолында болатын болашақтағы соғыстарға дайын болуымыз керек», – деп атап өтті Медведев.
Биылғы маусым айында РФ президенті Владимир Путин Украинамен соғысты аяқтап, бейбіт келісімге қол қоюға дайын екенін мәлімдеген болатын. Ол сонымен бірге мұндағы бірінші шарт етіп Украинаға осы кезге дейін өзінің оккупациялық армиясы басып алған Херсон, Запорожье, Донецк және Луганск облыстарының тұтас территорияларын Ресейге сөзсіз беруді және НАТО-ға мүше болудан бас тартуды ұсынды.
Бұған, әлбетте, Украина президенті Володимир Зеленьский келіскен жоқ. Ол мұны Ресей басшысы тарапынан жасалған «ультиматум» деп атап өтті.
