Қазақстанның TVCOM операторы Ресей телеарнасын көрсетуді тоқтатты
АСТАНА. 4 қаңтар. Қазақстанның TVCOM спутник және интернет-телеарна операторы 2024 жылдың қаңтарынан бастап Ресейдің «Первый каналы» бастаған бірнеше телеарнаны көрсетпеуге шешім қабылдады. Бұл туралы «Азаттық радиосы» дерегіне сүйенген rast.kz хабарлаqды.
Оператордың хабарламасына қарағанда, ақпараттық күн тәртібіндегі арна санын азайту үшін «ПКВС Казахстан» ЖШС топтамасының телеарналарын тоқтатуды ұйғарған. Соның нәтижесінде «Первый канал СНГ», «Поехали», «Время: далекое и близкое», «Дом кино», «Телекафе», «Дом кино Premium», «Музыка Первого», «Победа», «Карусель», «Бобер», «О!» телерналары көрсетілім тізімінен шыққан.
Оператор хабарламасында компания жетекшілігі ақпараттық жаңалық сипатындағы шетел арналарының үлесін біртіндеп азайтуды көздеп отырғаны сөз болған. TVCOM өз абоненттерінің «медиасауаты жетілгенін, жаңалықтарды әлеуметтік желіден алып отырғанын» жазған.
TVCOM Қазақстанның теле-радиотаратылым саласындағы операторы – «Қазтелерадио» акционерлік қоғамының серіктесі саналады.
Былтыр қарашада Қазақстан Ресей телеарналарын көруге мүмкіндік беретін Sputnik24 интернет-порталының жолын жапқан.
Одан бұрын тамыз айында ақпарат министрлігінің «экстремизм белгілері бар» деген топшылаумен Ресейдің «Царьград» сайтына бұғау салынған.
2022 жылдың соңында қоғамдық ой-пікірді бақылайтын Demoscope бюросының зерттеуі Қазақстан халқының кемі бестен бір бөлігі Ресей телеарналарын көретінін көрсеткен.
