USD
МӘСКЕУ. 2 шілде. Украина ұшқышсыз ұшақтары Ресейдегі мұнай өңдеу зауыттарының денін істен шығарған соң орыстар жаппай Қазақстаннан бензин сатып әкетуге көшті. Бұл туралы «Медуза» телеграм-арнасы ақпарына сүйенген rast.kz хабарлайды.
Ресейдегі отын дағдарысы «бензин туризмінің» пайда болуына алып барды. Қазір бұл елдің шекаралас аймақтарынан ағылған «туристер» Қазақстанның көршілес облыстарына барып, жағар май алып қайтуды үйреншікті кәсіпке айналдырып бара жатыр. Олар мұндағы бағаның Ресейде күн санап өсіп бара жатқан деңгейден көп төмен екенін білген соң ақырында оны осы жақтан тасымалдап сатуды бизнеске ұластыра бастаған сияқты.
«Ресейдің шекаралас аймақтарының тұрғындары өз үйлеріндегі тапшылық пен бағаның өсуі аясында автомобильдерге жанармай құю үшін Қазақстанға жиі барады. Әлеуметтік желілерде ресейлік жүргізушілер Қазақстандық жанармай құю станцияларының бағаларын көрсетіп, оларды ресейлік жүргізушілермен салыстыратын видеолар танымал бола бастады», – деп атап көрсетті «Медуза».
Осындай роликтердің бірін Қазақстанның Самарадан 200 шақырым жерде орналасқан Орал қаласындағы жанармай құю станциясында автоблогер Алексей Епищенко түсірген. Оның есептеулері бойынша, рубльге қайта есептегеннен кейін АИ-98 шамамен – 53 рубль, АИ-95 – 46 рубль, АИ-92 – 35 рубль, дизель 51 рубль тұрады екен.
«Ресейдегі бензин бағасы алғаш рет литріне 100 рубльден өтті», деп хабарлайды Reuters.
«Өздеріңіз ойлағандай, бұл біздікінен екі есе арзан, бірақ бұл ең арзанға түсетін жанармай емес. Біздің алдымызда шынымен екі сағаттық жол бар», – дейді блогер.
Осыған ұқсас видеоларды басқа ресейліктер де жариялап жатыр. Олардың бірінде авторлар Қазақстандағы жанармай құю станциясының бағасын көрсетіп, бензиннің литрі шамамен 50 рубль тұратынын атап өтті. Сондай-ақ, олар жанармай құю бекетінде валюта айырбастауға болатынына да назар аударады.
Қазақстан жанармай құю станцияларына деген қызығушылық Ресейдегі жанар-жағармай проблемалары аясында өсті. Ресейлік БАҚ мәліметтері бойынша, 40-тан астам аймақ жанармай құюға шектеулер енгізген, ондаған қалаларда жанармай құю станцияларына кезек пайда болған, кейбір жерлерде станциялардың бір бөлігі жабылып қалған.
