Пригожин президенттік рейтинг жариялап, Путинге ашық қарсы шықты
МӘСКЕУ. 11 мамыр. «Вагнер» әскери компаниясының қожайыны Евгений Пригожин президенттік рейтингті жария етіп, РФ президентін жауласуға шақырды. Бұл туралы шетелдік ресурстарға сілтеме жасаған rast.kz хабарлайды.
Сұрау салудың нәтижесі бойынша, «вагнершілер» кураторы Кремльдің қазіргі қожайынынан небәрі 3 пайыз ғана қалып қойған.
РФ қорғаныс министрлігімен және бас штабымен ұдайы шәлкем-шәліс келіп қалып жүрген Евгений Пригожин, шамасы, енді ресейлік генералдардың ғана емес, одан да әрі кетіп, Кремльдің басшысы Путиннің өзінің шабынан түртіп көрмекші болған сияқты.
Әңгіменің төтесі: «вагнершілер» кураторымен байланысы бар мәнбелер кеше жариялап жіберген «телефон арқылы 2023 жылғы 10 мамырда жүргізілген сауалдама» нәтижелеріне сәйкес, Пригожин Путиннен 3 пайызға да жетпейтін мөлшерде қалып тұр екен. Аталмыш мәліметке сенсек, алдағы жексенбілердің бірінде президент сайлауы өтіп жатса, сайлаушылардың 42,5 пайызы – Путинге, ал 39, 7 пайызы Пригожинге дауыс бермекші. Демек, екеуі сайлаудың екінші кезеңінде бір-бірлерімен президент орынтағына таласа алады.
Сауалдама қорытындысы бойынша үшінші орынды үкімет басшысы Михаил Мишустин алуға тиіс. Ал қалғандары 1 пайыздық та деңгейге жете алмайды. Айтқандай, Пригожин ұдайы сынап жүрген РФ қорғаныс министрі Сергей Шойгу бар болғаны 0,1 пайыздық дауысқа ие болады.
«Пригожин өзінің Путинге деген ашық оппозициялық позициясын көрсете бастады. Бұл өмір мен өлімнің айқасқа түскенін байқатады. Өйткенің, Путин де, Пригожин де әдетте өздерімен жауласқан адамдарды өлтірмей тынбайды. Ресейдегі жағдайдың астаң-кестең болып дүрбелеңге түсетіні мейлінше шындыққа айналып келе жатқан сияқты немесе көп тармақты партизандық шабуылдар осымен басталып кетті ме екен?», – деп жазды швед экономисі және дипломаты Андерс Ослунд өзінің Twitter-акканутында.
Ресейдің Пригожинмен байланысы бар телеграмм-каналдары жоғарыда айтылған сауалдама қорытындылары жайлы хабарлап қана қоя салған жоқ, сонымен бірге оны 2024 жылы өткізу жоспарланған президент сайлауына кандидат ретінде үгіттеуге кірісіп кетті.
Осымен бір мезгілде «Медуза» Кремльге жақын мәнбелерге сілтеме жасап, Пригожиннің қорғаныс министрлігінің мәнзіліне айтқан сындарының «РФ-ның жоғары басшылығын едәуір алаңдатып» отырғанын атап өтті.
Мұның алдында Пригожин Путиннің 9 мамыр парадында сөйлеген сөзіне қатысты біраз ащы мысқылдар мен кекесіндер білдірген еді.
