USD
АСТАНА. 10 қыркүйек. Халықаралық Forbes Woman Kazakhstan рейтингті Қазақстандағы ең ықпалды әйелдердің жаңа рейтингісін дайындап ұсынды. Бұл туралы Kursiv.media ақпарына сілтеме жасаған rast.kz хабарлайды.
Қазақ қоғамында белгілі бір ықпалы бар ханымдардың тізіміне банк басшылары, мемлекеттік қызметкерлер, кәсіпкерлер, белсенділер және мәдениет өкілдері топтастырылған.
Алдын ала іріктеуден кейін 55 әйелдің ықпалын сарапшылар бағалаған. Нәтиженің 90%-ы сарапшылардың бағасына, ал қалған бөлігі қаржы көрсеткіштері, жобалардың ауқымы және медиадағы танымалдық деңгейіне сүйеніп есептелген.
Forbes Woman Kazakhstan рейтингті әзірлеу барысында экономика, саясат және азаматтық қоғам саласындағы 170-тен астам үміткерді қарастырған.
Рейтинг көшінің ұшар басында Halyk Bank басқармасының төрайымы Үміт Шаяхметова (1-орын, 57 жаста) тұр. Аталмыш банкті 17 жылдан бері үзіліссіз басқарып келе жатұан ол әрі директорлар кеңесінің мүшесі болып табылады.
Бұдан кейінгі сатыға Қаржы нарығын реттеу және дамыту агенттігінің төрағасы Мәдина Әбілқасымова (2-орын, 48 жаста) орналасқан. Ол агенттікті 2020 жылдан бері басқарады және Ұлттық банк басқармасының құрамына кіреді.
Үзідік үштік тобында Аида Балаева (3-орын, 52 жаста) да бар. Ол аталмыш рейтинг түзілген кезде Премьер-Министрдің орынбасары – Мәдениет және ақпарат министрі қызметінде еді. Алайда тізім жарияланар алдында, 31 тамызда Қауіпсіздік кеңесі төрағасының орынбасары болып кетті.
Алғашқы бестікті Отбасы банк басқармасының төрайымы Ләззат Ибрагимова (4-орын, 53 жаста) мен эколог, кәсіпкер әрі «Сәби» қорының негізін қалаушы Әсел Тасмағамбетова (5-орын, 46 жаста) тиянақтайды.
Керуеннің келесі көшіндегі «Милосердие» ерікті қоғамының жетекшісі Аружан Саин (6-орын, 50 жаста), Ұлттық бала асырап алу агенттігінің басшысы Анар Рақымбаева (7-орын, 55 жаста), Денсаулық сақтау министрі Ақмарал Әлназарова (8-орын, 55 жаста), Оқу-ағарту министрі Жұлдыз Сүлейменова (9-орын, 43 жаста), Қазақстан қаржыгерлері қауымдастығы кеңесінің төрайымы Елена Бахмутова (10-орын, 64 жаста) ондықты аяқтайды.
Екінші ондықтың Президент радиокешенінің бас директоры Раушан Қажыбаева (11-орын, 47 жаста), Lancaster Group акционерлік қоғамының құрылтайшысы Гауһар Қаппарова (12-орын, 51 жаста), «Дара» қорының негізін қалаушы Гүлнәр Досаева (13-орын, 51 жаста), Конституциялық сот төрағасы Эльвира Әзімова (14-орын, 53 жаста), Ұлттық банк төрағасының орынбасары Әлия Молдабекова (15-орын, 50 жаста), бала құқықтары жөніндегі уәкіл Динара Зәкиева (16-орын, 43 жаста), Qaganat желісінің негізін қалаушы Шынар Бүгімбаева (17-орын, 56 жаста), AIX басқармасының тәуелсіз директоры Алина Алдамберген (18-орын, 53 жаста), Президент Әкімшілігі басшысының орынбасары Әсел Жанасова (19-орын, 39 жаста) және AIX басқармасының төрайымы Әсел Мұқажанова (20-орын, 55 жаста) құрайды.
Ал соңғы бестікті шоу-бизнес продюсері Баян Алагөзова (21-орын, 52 жаста), белгілі пианист Жәния Әубәкірова (22-орын, 69 жаста), Zhanna Kan Group тобның егесі Жанна Кан (23-орын, 57 жаста), Sansi Group қоғамының басшысы Гауһар Әбіқаева (24-орын, 53 жаста) және Parasat бизнес-клубының төрайымы Раушан Жақсыбай (25-орын, 53 жаста) түйіндейді.
